مدینہ منورہ میں حجاج کرام کی خدمات کے لیے 32 مقامات مختص

ریاض(اُردو پوائنٹ اخبارتازہ ترین - این این آئی۔08 اگست ۔2016ء)سعودی عرب کی حکومت کی جانب سے عازمین حج و عمرہ کے لیے مکہ مکرمہ کے ساتھ مدینہ منورہ میں بھی غیرمعمولی اقدامات کیے ہیں۔ دوسری جانب غیر سرکاری فلاحی ادارے بھی حجاج ومعتمرین کی خدمات میں پیش پیش ہیں۔ سعودی عرب میں نجی سطح پر شہریوں کی رہ نمائی سے متعلق ایک ادارے نے مدینہ منورہ اور مسجد نبوی میں 32 مقامات پرحجاج کرام کو خدمات مہیا کرنے کا اعلان کیا ہے۔

(جاری ہے)

عرب ٹی وی کے مطابق ادارے کی جانب سے روضہ رسول پرآنے والے عاشق رسول کی رہ نمائی اور مدد کے لیے 2600 رضاکاروں کی خدمات فراہم کرنے کا فیصلہ کیا گیا ہے جو مجموعی طور پر زائرین کو 56 اقسام کی سہولیات مہیا کریں گے۔ سول کاسٹ انسٹیٹیوٹ کے بورڈ آف ڈائریکٹر کے رکن انجینئر یاسر بن غالب دبور نے میڈیا کو بتایا کہ ادارہ مدینہ منورہ میں آنے والے حجاج کرام کی خدمت کے لیے ٹرانسپورٹ اور انٹرنیٹ کی سہولت بھی مہیا کرے گا۔ اس مقصد کے لیے 104 گاڑیاں وقف کی گئی ہیں۔ 150 مقامات پر انٹرنیٹ سروس اور 220 موبائل انٹرنیٹ ڈیوائسز مہیا کرے گا۔