ٹیوٹا کا 38نوجوانوں کا گروپ ملائشیاء بھجوا نے کا اعلان ، تقرر نامہ اور ویزے جاری ہو چکے ہیں‘ عرفان قیصر شیخ

لاہور ( اُردو پوائنٹ اخبارتازہ ترین - این این آئی۔09 اگست ۔2016ء) ٹیکنیکل ایجوکیشن اینڈ ٹریننگ اتھارٹی (ٹیوٹا)38نوجوانوں کا گروپ ملائشیاء بھجوا رہی ہے جنہیں تقرر نامہ اور ویزے جاری ہو چکے ہیں، ٹیوٹاہنر مندوں کو 42ہزار روپے ماہانہ تنخواہ کے علاوہ فری میڈیکل، رہائش، خوراک ، ٹرانسپورٹ کی سہولیات ملیں گی،پہلی کھیپ کے طور پر 27نوجوانوں کودبئی اور ملائشیاء بھجوایا جا چکا ہے ۔

چیئر پرسن ٹیوٹا عرفان قیصر شیخ نے ان خیالات کا اظہار ٹیوٹا پاس آؤٹس کو ویزہ فراہم کرنے کے حوالے سے منعقدہ تقریب سے خطاب کرتے ہوئے کیا۔ اس موقع پر چیف آپریٹنگ آفیسر ٹیوٹا جواد احمد قریشی ،ٹیوٹا افسران اختر عباس بھروانہ، عامر عزیز، اظہر اقبال شاد، عمر فاروق، عظمی نادیہ، عائشہ قاضی، مصطفی کمال پاشا، امبر چٹھہ اوردیگر افسران کے علاوہ ویزہ و تقرر نامہ حاصل کرنے والے نوجوان موجودتھے۔

(جاری ہے)

عرفان قیصر شیخ نے بتایا کہ پاکستانی تارکین وطن کے ترسیلات زر میں 3 ارب روپے سالانہ کمی ہوئی ہے۔ ٹیوٹا 10ہزار ہنر مند افراد بیرون ملک بھیج کر زرمبادلہ کی اس کمی پورا کر دے گی۔ ایکور مین پاور ریسورس برائے پراجیکٹ آف پیٹروناس ملائشیاء ٹیوٹا کے نوجوانوں کو فٹر ، ایلومینیم اور کنسٹرکشن شعبہ جات میں روزگار فراہم کررہی ہے۔ ہم ان کے بے حد شکر گزار ہیں کہ وہ ٹیوٹا کے نوجوانوں کیلئے روزگار کا بندوبست کر رہے ہیں۔

چیئر پرسن ٹیوٹا نے مزید کہا کہ اس وقت مشرق وسطی کے بہت سے ادارے ٹیوٹا کے فارغ التحصیل نوجوانوں کو نوکریاں دینے کیلئے رابطے کر رہے ہیں ۔ان اداروں کے ساتھ نوجوانوں کو بہتر روزگار فراہم کرنے کیلئے ٹیوٹا کی بات چیت جاری ہے ۔ ان اداروں سے رابطے صوبہ پنجاب کی ماہر افرادی قوت کو روزگار کی فراہمی اور انہیں بیرون ممالک اپنی قابلیت ثابت کرنے میں مدد گار ثابت ہونگے۔