جنگی جنون میں مبتلا بھارت کی ایل او سی اور ورکنگ بائونڈری پر جارحیت کے بعد آبی جارحیت

لاہور(اُردو پوائنٹ اخبارتازہ ترین - آئی این پی۔ 14 نومبر2016ء) جنگی جنون میں مبتلا بھارت نے ایل او سی اور ورکنگ بائونڈری پر جارحیت کے بعد آبی جارحیت شروع کر دی‘ بھارت نے دریائے چناب پر پانی روک لیا، مرالہ راوی لنک کینال اور لوئر چناب کینال کو پانی کی فراہمی بند ہوگئی، پانی کی قلت سے پاکستان میں گندم کی بوائی میں تاخیر کا خدشہ پیدا ہوگیا ہے۔

تفصیلات کے مطابق سی پیک منصوبے پر خوفزدہ بھارت پاکستان مخالف سازشوں سے باز نہ آیا زمینی جارحیت کے بعد بھارت آبی دہشت گردی پر اتر آیا ہے اور بھارت نے سندھ طاس معاہدہ کی خلاف ورزی کرتے ہوئے دریائے چناب کاپانی روک لیا ہے۔ہیڈمرالہ کے مقام پر پانی کی آمد صرف ساڑھے ہزار کیوسک رہ گئی ہے، پانی کی قلت سے مرالہ راوی لنک کینال کو پانی کی فراہمی بند ہوگئی جبکہ تین ہفتے قبل خانکی بیراج سے نکلنے والی نہر لوئر چناب کینال کو بھی بند کردیا گیا تھا۔

(جاری ہے)

ذرائع کے مطابق حکومت نے تاحال بھارتی آبی جارحیت پر کوئی نوٹس نہیں لیا، پانی قلت میں کمی جاری رہی تو آپر چناب کینال کے بند ہونے کا خدشہ ہے۔آبی مسائل پر پاکستان کے مختلف شہروں گوجرانوالہ ، لاہور ، قصور ، فیصل آباد ، چنیوٹ ، جھنگ اور ٹوبہ ٹیک سنگھ میں گندم کی فصل کی بوائی میں تاخیر کا خدشہ بھی ہے۔کسانوں نے دریائے چناب کا پانی روکے جانے پر بھارت کے خلاف حکومت کو عالمی سطح پر اس مسئلہ کو اجاگر کرنا چاہیئے۔