امریکا میں پاکستانی فلموں پر مبنی پہلا فیسٹیول 3 دسمبر کو شروع ہوگا

پاکستان کے نوجوان فلم ساز ناقابل یقین حد تک بہترین فلمیں تیار کر رہے ہیں، ملیحہ لودھی

بدھ 16 نومبر 2016 11:45

امریکا میں پاکستانی فلموں پر مبنی پہلا فیسٹیول 3 دسمبر کو شروع ہوگا
نیویارک(اُردو پوائنٹ اخبارتازہ ترین - این این آئی۔ 16 نومبر2016ء) امریکا میں پاکستانی فلموں کی نمائش پر مبنی پہلے فلم فیسٹیول کا انعقاد 3 تا 4 دسمبر کو امریکا میں پاکستان کے مستقل مشن کے زیر اہتمام ہوگا۔دو روزہ یہ فلم فیسٹیول ایشیاء سوسائٹی میں ہو گا۔ فیسٹیول میں نمائش میں پیش کی جانے والی فلموں میں دو نئی فلمیں ’’دوبارہ پھر سے‘‘ اور ’’لاہور سے آگے‘‘ بھی شامل ہیں۔

ان کے علاوہ ’’ایکٹر ان لاء ‘‘ آسکر ایوارڈز کے لیے نامزد ہونے والی فلم ’’ماہ میر‘‘ آسکر ایوارڈ جیتنے والی شرمین عبید چنائے کی اینی میٹڈ فلم ’3 بہادر‘، دختر، ڈانس کہانی اور ہو من جہاں بھی اس فیسٹیول میں پیش کی جائیں گی۔یہ فیسٹیول اقوام متحدہ میں پاکستان کی مستقل مندوب ملیحہ لودھی کی قیادت میں امریکا میں موجود پاکستانی مشن کی جانب سے پاکستان کا روشن چہرہ پیش کرنے کوششوں کا ایک حصہ ہے۔

(جاری ہے)

اس فیسٹیول سے متعلق گفتگو کرتے ہوئے ان کا کہنا تھا کہ ’’ پاکستان کے نوجوان فلم ساز ناقابل یقین حد تک بہترین فلمیں تیار کر رہے ہیں جو ملک میں جاری ثقافتی ترقی میں مددگار ثابت ہو رہی ہیں۔ملیحہ لودھی نے کہا کہ ’’ہم پاکستان میں بنائی گئی چند فلموں کو امریکا میں لا رہے ہیں تاکہ 193 ممالک کے سفیروں کو بھی یہ دیکھنے کا موقع ملے کہ پاکستان کی شوبز انڈسٹری کیا بنا رہی ہے۔ فیسٹیول کا آغاز 2 دسمبر کو اقوام متحدہ میں ریڈ کارپٹ کی تقریب سے ہو گا۔

متعلقہ عنوان :