تحریک انصاف نے پانامہ لیکس کیس کی پیروی کرنے والی وکلاء کی ٹیم کی تبدیلی کی‌خبروں کی تردید کر دی

محمد علی جمعرات 17 نومبر 2016 21:41

اسلام آباد (اردوپوائنٹ اخبارتازہ ترین۔17نومبر2016ء) تحریک انصاف نے پانامہ لیکس کیس کی پیروی کرنے والی وکلاء کی ٹیم کی تبدیلی کی‌خبروں کی تردید کر دی ہے۔ تفصیلات کے مطابق خبریں سامنے آئی تھیں کہ تحریک انصاف کے سربراہ عمران خان سپریم کورٹ میں چل رہے پانامہ لیکس کیس کی پیروی کرنے والے پارٹی کے وکیل حامد خان کی کارگردگی سے نالاں ہیں۔

(جاری ہے)

حامد خان کی کارگردگی پر پارٹی کے سینئر رہنماوں کو بھی تحفظات ہیں جس کے باعث کیس کی پیروی کرنے والی وکلاء کی ٹیم کی تبدیلی پر غور ہو رہا ہے۔

تاہم اب اس حوالے سے تحریک انصاف کے ترجمان نعیم الحق کی جانب سے وضاحتی بیان جاری کیا گیا ہے۔ نعیم الحق کی جانب سے ایسی تمام خبروں کی تردید کرتے ہوئے کہا گیا ہے کہ چیرمین تحریک انصاف قانونی ٹیم کی کارکردگی سے مطمئن ہیں۔ قانونی ٹیم سے متعلق بے بنیاد اور بدنیتی پر مبنی اطلاعات حکومتی شرارت ہے۔ ٹیم انتہائی مہارت سے سپریم کورٹ کی معاونت میں مصروف ہے۔