سالِ نو کی رات واٹس ایپ پر 63 ارب پیغامات کا تبادلہ

پیغامات میں تقریبا 7.9 ارب تصاویر اور 2.4 ارب کے قریب وڈیوز شامل ہیں،ترجمان وٹس ایپ

پیر 9 جنوری 2017 13:49

سالِ نو کی رات واٹس ایپ پر 63 ارب پیغامات کا تبادلہ

نیویارک(اُردو پوائنٹ اخبارتازہ ترین - این این آئی۔ 09 جنوری2017ء) فوری پیغام رسانی کی معروف سروس واٹس ایپ نے کہاہے کہ سالِ نو کی رات اس کے صارفین کی جانب سے بھیجے گئے پیغامات کی مجموعی تعداد 63 ارب تک پہنچ گئی جو واٹس ایپ ایپلی کیشن کے لیے ایک ریکارڈ ہے۔میڈیارپورٹس کے مطابق واٹس ایپ ایپلی کیشن کے ذریعے لوگ تحریری پیغامات ، تصاویر اور وڈیوز کے تبادلے کے علاوہ آڈیو اور وڈیو کال سے بھی مستفید ہو سکتے ہیں۔

(جاری ہے)

واٹس ایپ کے ترجمان نے بتایا کہ مذکورہ 63 ارب پیغامات میں تقریبا 7.9 ارب تصاویر اور 2.4 ارب کے قریب وڈیوز شامل ہیں۔واضح رہے کہ واٹس ایپ ایپلی کیشن کے مالکانہ حقوق رکھنے والی کمپنی فیس بک کے بانی اور چیف ایگزیکٹو مارک زوکربرگ نے گزشتہ برس اپریل میں بتایا تھا کہ واٹس ایپ اور فیس بک میسنجر ان دو ایپلی کیشنوں کے ذریعے روزانہ بھیجے جانے والے پیغامات کی مجموعی تعداد 60 ارب کے قریب ہے۔اس کے مقابل ٹیلی گرام ایپلی کیشن کے صارفین روزانہ 15 ارب پیغامات بھیجتے ہیں۔فیس بک نے 2014 میں 20 ارب ڈالر سے زیادہ کے عوض واٹس ایپ کمپنی کو خرید لیا تھا اور اب دنیا بھر میں واٹس ایپ ایپلی کیشن کو استعمال کرنے والے افراد کی تعداد 1 ارب سے زیادہ ہے۔