پاکستان سپر لیگ کی فائنلسٹ ٹیم کوئٹہ گلیڈی ایٹرز کے کھلاڑی اور عملہ وطن واپس پہنچ گیا

جیسے ہم نے دبئی اور شارجہ میں اچھی کرکٹ کھیلی ہے ،ْ فائنل جیتنے کی بھرپور کوشش کریں گے ،ْسرفراز احمد فائنل میں پہنچنے پر ٹیم کے لڑکوں کی محنت ہے، ہر کھلاڑی نے اپنی جگہ اچھا پرفارم کیا ،ْ اسی کو ٹیم کی مشترکہ کارکردگی کہا جاتا ہے ،ْ معین خان

جمعرات 2 مارچ 2017 12:53

کراچی/ لاہور(اُردو پوائنٹ اخبارتازہ ترین - این این آئی۔ 02 مارچ2017ء) پاکستان سپر لیگ کی فائنلسٹ ٹیم کوئٹہ گلیڈی ایٹرز کے کھلاڑی اور دیگر عملہ وطن واپس پہنچ گیا ہے۔کوئٹہ گلیڈی ایٹرز کے کپتان سرفراز احمد، کوچ معین خان، ٹیم کے مالک ندیم عمر دیگر کھلاڑیوں اسد شفیق ،ْانور اعلی اور نور ولی کے ہمراہ کراچی ایئرپورٹ پہنچے تو عوام کی بڑی تعداد نے انہیں خوش آمدید کہا۔

کراچی ایئرپورٹ پر میڈیا سے بات کرتے ہوئے سرفراز احمد نے کہا کہ جیسے ہم نے دبئی اور شارجہ میں اچھی کرکٹ کھیلی ہے، لاہور میں بھی شاندار کارکردگی کے ذریعے فائنل جیتنے کی بھرپور کوشش کریں گے۔ ٹیم کی جیت کے پیچھے چھپے راز کے حوالے سے کوئٹہ گلیڈی ایٹرز کے قائد کا کہنا تھا کہ اس ٹیم کی کامیابی کا سب سے بڑا راز کھلاڑیوں میں یکجہتی اور ٹیم منیجمنٹ کا کھلاڑیوں کے ساتھ اچھا رویہ ہے۔

(جاری ہے)

پی ایس ایل فائنل لاہور میں ہونے کے حوالے سے سرفراز احمد نے کہا کہ یہ بہت ہی خوش آئند بات ہے کہ فائنل میچ پاکستان میں ہو رہا ہے ،ْ پی ایس ایل فائنل لاہور میں کرانے کیلئے پی سی بی اور پی ایس ایل کی انتظامیہ مبارکباد کی مستحق ہے۔ غیر ملکی کھلاڑیوں کے اہم ترین میچ میں ٹیم میں شامل نہ ہونے سے متعلق پوچھے گئے سوال پر کوئٹہ گلیڈی ایٹرز کے کپتان نے کہاکہ اگر ایک دم آپ کی ٹیم کے 4 سے 5 اہم کھلاری ٹیم سے باہر ہو جائیں تو کارکردگی پر بہت فرق پڑتا ہے تاہم کوشش ہو گی کہ جو بہترین کھلاڑی میسر ہیں انہیں ٹیم میں شامل کیا جائے۔

کوئٹہ گلیڈی ایٹر کے کوچ معین خان نے کہاکہ فائنل میں پہنچنے پر ٹیم کے لڑکوں کی محنت ہے، ہر کھلاڑی نے اپنی جگہ اچھا پرفارم کیا اور اسی کو ٹیم کی مشترکہ کارکردگی کہا جاتا ہے۔ کوئٹہ گلیڈی ایٹرز کے مالک ندیم عمر کا کہنا ہے کہ غیر ملکی کھلاڑیوں کو فائنل کے لئے وطن لانے کی پوری کوشش کر رہے ہیں۔کوئٹہ گلیڈی ایٹرز کے اسسٹنٹ کوچ عبدالرزاق، اوپنر احمد شہزاد، محمد نواز، ذوالفقار بابر، سعد نسیم اور عمر امین لاہور پہنچے جہاں کھلاڑیوں کا کرکٹ شائقین نے شاندار استقبال کیا۔

واضح رہے کہ 5 مارچ کو لاہور میں ہونے والے پی ایس ایل فائنل کے لئے کوئٹہ گلیڈی ایٹرز کے کھلاڑی ایک روز آرام کے بعد لاہور میں یکجا ہوں گے ،ْ پی ایس ایل کی دوسری فائنلسٹ ٹیم کا فیصلہ کراچی کنگز اور پشاور زلمے کے مابین ہونے والے میچ کے بعد ہو گا۔ کوئٹہ گلیڈی ایٹرز کو فائنل میں کیوین پیٹرسن، ٹائمل ملز اور رائلی روسو جیسے تجربہ کار کھلاڑیوں کی خدمات حاصل نہیں ہوں گی تاہم کوئٹہ کے مینٹور (گرو) ویون رچرڈز فائنل کے لئے پاکستان آنے کی حامی بھر چکے ہیں۔