آسٹریلوی ہائی کمشنر کی وزیر تعلیم رانا مشہود سے ملاقات

جنوبی ایشیاء میں پنجاب فروغ تعلیم کی بہترین مثال بن کر ابھرا ہے‘رانا مشہود

ہفتہ 18 مارچ 2017 17:04

آسٹریلوی ہائی کمشنر کی وزیر تعلیم رانا مشہود سے ملاقات

لاہور (اُردو پوائنٹ اخبارتازہ ترین - این این آئی۔ 18 مارچ2017ء) صوبائی وزیر سکولز ایجوکیشن رانا مشہود احمد خاں سے آسٹریلیا کی ہائی کمشنر مارگریٹ ایڈمسن نے مقامی ہوٹل میں ملاقات کی۔ ملاقات کے دوران باہمی دلچسپی کے امورپرتبادلہ خیال کیا گیا۔ اس موقع پر فریقین نے تعلیم، ثقافت اور دیگر شعبوں میں حکومت پنجاب اور آسٹریلیا کے درمیان دو طرفہ تعاون بڑھانے کے امکانات پر تفصیلی تبادلہ خیال کیا۔

اس موقع پر رانا مشہود نے آسٹریلین ہائی کمشنر کو سکول ایجوکیشن کے شعبہ میں اصلاحات کے عمل سے آگاہ کیا۔ انہوں نے کہا کہ صوبہ پنجاب اپنی بے مثال تعلیمی کارکردگی کی بدولت پورے جنوبی ایشیاء میں روشن مثال بن کر ابھرا ہے۔ حکومتی کوششوں سے سکولوں میں شرح داخلہ میں نمایاں بہتری آئی ہے۔

(جاری ہے)

پنجاب ماڈل کو دنیا بھر میں مثال کے طور پر لیا جا رہا ہے۔

انہوں نے کہا کہ پاکستانی طالبعلموں میں بیرون ملک تعلیم کا رجحان بڑھا ہے اور آسٹریلیا میں پاکستانی طالبعلموں کی موجودگی اس بات کا ثبوت ہے کہ ہمارے نوجوان تعلیم کو بنیاد بنا کر زندگی کی راہ میں آگے بڑھ رہے ہیں۔ انہوں نے مزید کہا کہ صوبہ پنجاب میں طالبعلموں کی تعلیم تک بلا امتیاز رسائی سے حقوق اطفال کے تقاضے پورے ہو رہے ہیں اور اس طرح پنجاب ایک چائلڈ فرینڈلی صوبہ بن کر سامنے آیا ہے۔اس موقع پر آسٹریلین ہائی کمشنر مارگیٹ ایڈمسن نے حکومت پنجاب کی تعلیمی اصلاحات کو سراہا۔