افریقی کرکٹر جے پی ڈومنی نے آئی پی ایل میں شرکت سے معذرت کرلی

نئی دہلی(اُردو پوائنٹ اخبارتازہ ترین - آن لائن۔ 21 مارچ2017ء) جنوبی افریقہ کے معروف کرکٹر جے پی ڈومنی نے بھی انڈین پریمیئر لیگ (آئی پی ایل) میں شرکت سے معذرت کر لی ہے اور اپنی فرنچائز دہلی ڈئیرڈیولز کو اپنے فیصلے سے آگاہ کر دیا ہے۔32 سالہ آل رائونڈر نے کہا کہ وہ ذاتی وجوہات کے باعث اگلے مہینے شروع ہونے والی آئی پی ای ایل میں شریک نہیں ہو سکیں گے جس پر دہلی ڈئیرڈیولز فرنچائز نے مایوسی کا اظہار کیا ہے۔

دہلی ڈئیر ڈیولز فرنچائز نے جے پی ڈومنی کی جانب سے بیان جاری کیا کہ ’’یہ فیصلہ کرنا میرے لئے بہت مشکل تھا لیکن یہ خالص ذاتی وجوہات کی بنائ پر کیا ہے۔ میں مستقبل قریب میں فرنچائز کی نمائندگی کرنے کیلئے پرامید ہوں۔‘‘واضح رہے کہ ڈومنی نے آئی پی ایل کے گزشتہ 7 ایڈیشنز میں 38 میچ کھیلے ہیں۔

(جاری ہے)

انہوں نے 2014ئ میں دہلی ڈئیرڈیولز میں شمولیت اختیار کی تھی اور گزشتہ ایڈیشن کے آخری دو میچوں میں ظہیر خان کی جگہ کپتانی بھی کی تھی۔

دہلی ڈئیرڈیولز کے چیف ایگزیکٹو ہیمنت نے جے پی ڈومنی کے بیان پر ردعمل کا اظہار کرتے ہوئے کہا ہے کہ ’’ہم کرکٹر کے فیصلے کا احترام کرتے ہیں، ہم فطری طور پر بہت زیادہ مایوس ہیں کہ وہ اس سال ٹیم کی نمائندگی نہیں کریں گے لیکن بطور فرنچائز ہم ان کی پوزیشن کو واضح طور پر سمجھ سکتے ہیں۔‘‘