حکومت پنجاب نے دوسرے صوبوں کے طالبعلموں کو مفت تعلیم دے کر وفاق کو مستحکم کیا ہے،صوبائی وزیرسید رضا علی گیلانی

لاہور۔21 مارچ(اُردو پوائنٹ اخبارتازہ ترین - اے پی پی۔ 21 مارچ2017ء) صوبائی وزیر ہائر ایجوکیشن سید رضا علی گیلانی نے کہا ہے کہ حکومت پنجاب نے دوسرے صوبوں کے طالبعلموں کو اپنے تعلیمی اداروں میں مفت تعلیم کی سہولیات مہیا کر کے وفاق کو مستحکم کیا ہے،یہ بات خوش آئند ہے کہ بلوچستان اور خیبر پختونخوا سمیت دیگر وفاقی اکائیوں سے تعلق رکھنے والے طالبعلموں کو پنجاب میںاعلیٰ تعلیم کی بہترین سہولیات مہیا کی گئی ہیں، پنجاب کی تعلیمی سہولیات سے سارے صوبے مل کر فائدہ اٹھا رہے ہیں۔

یہ بات صوبائی وزیر ہائر ایجوکیشن سید رضا علی گیلانی نے جامعہ پنجاب میں پختون ثقافتی میلہ کی تقریب سے خطاب کرتے ہوئے کہی۔اس موقع پر پختون طالبعلموں نے زبان وادب، خوراک، لباس اور کٹلری کے مختلف سٹالز کے ذریعے پختون فنون و ثقافت کے مختلف پہلوئوں کو اجاگر کیا۔

(جاری ہے)

صوبائی وزیر نے اپنے خطاب میں کہا کہ پاکستان کی کثیر الجہتی ثقافت کے ان گنت نمونوں نے معاشرے میں رواداری، برداشت اور پرامن بقائے باہمی کی خوبصورت روایات کو آگے بڑھایا ہے۔

انہوں نے کہا کہ حکومت پنجاب نے دیگر صوبوں میں بسنے والے عوام کی بھلائی کیلئے منظم اقدامات کئے ہیں۔حقیقت تو یہ ہے کہ قومی بھلائی کے کاموں میںپنجاب ہمیشہ پیش پیش رہا ہے ۔انہوں نے کہا کہ ہماری خوشیاں اور غم سانجھے ہیں،پنجاب کے عوام کے دل دیگر اکائیوں میں آباد لوگوں کے ساتھ ساتھ دھڑکتے ہیں۔ اس موقع پر صوبائی وزیر نے مختلف سٹالز کا دورہ کیا اور طلبہ و طالبات کو پختون ثقافت کی خوبصورت پروجیکشن پر مبارکباد دی۔

قبل ازیں طالبعلموں نے پختون ثقافت کے مختلف رنگ پیش کئے جس کی حاضرین نے دل کھول کر داد دی۔دریں اثناء صوبائی وزیر رضا گیلانی نے ایک نجی جامعہ میں بزنس مینجمنٹ میں عصری مسائل کے موضوع پرمنعقدہ دو روزہ چوتھی بین الاقوامی کانفرنس کا افتتاح کیا۔افتتاحی تقریب سے خطاب کرتے ہوئے رضا گیلانی نے کہا کہ پاکستانی معیشت ترقی کی جانب گامزن ہے،سی پیک کی بدولت پاکستان خطے میں سب سے اہم معاشی پلیئر بن کر ابھرا ہے۔

ہمارے معاشی اشارے دیگر ممالک سے بہت بہتر ہیں۔انہوں نے کہا کہ اس حوالے سے جامعات کو چاہئے کہ وہ قومی معاشی اہداف کے حصول کیلئے طالبعلموں کو تیار کریں۔اکیسویں صدی کی معاشی حکمت عملی میں اعلیٰ تعلیم کا کردار کلیدی ہے۔انہوں نے کہا کہ اس حوالے سے حکومت پنجاب اعلیٰ تعلیم کے اداروں کو عالمی معیار کے مطابق ڈھالنے کیلئے منظم روڈ میپ پر عملدآمد کر رہی ہے۔