اسلام آباد میں پانی کی شدید قلت، تحریک انصاف کا وفاقی حکومت کے خلاف احتجاجی تحریک کا آغاز

پانی کا مسئلہ متعدد بار قومی اسمبلی اور میئر اسلام آباد تک ہر فورم پر اٹھانے کے باوجود جوں کا توں ہے، اسلام آباد کے عوام کو پیاسا تڑپایا جا رہا ہے، راجہ خرم نواز ا/ شہزاد گل

بدھ 29 مارچ 2017 20:20

اسلام آباد(اُردو پوائنٹ اخبارتازہ ترین - آن لائن۔ 29 مارچ2017ء) دارالحکومت اسلام آباد میں پانی کی شدید قلت پر تحریک انصاف اسلام آباد نے وفاقی حکومت کے خلاف احتجاجی تحریک کا آغاز کر دیا جس کا مقصد اسلام آباد کے شہریوں کے بنیادی حقوق کا تحفظ کرنا ہے۔ اسلام آباد میں پانی کا مسئلہ متعدد بار قومی اسمبلی اور میئر اسلام آباد تک ہر فورم پر اٹھانے کے باوجود جوں کا توں ہے۔

اسلام آباد کے عوام کو پیاسا تڑپایا جا رہا ہے۔ان خیالات کا اظہار تحریک انصاف اسلام آباد ریجن کے صدر راجہ خرم نواز اور جنرل سیکریٹری شہزاد گل نے اپنے ایک بیان میں کیا۔احتجاجی تحریک میںصدر ٹریڈرز وونگ ندیم گجر، جنرل سیکریٹری ڈسٹرکٹ این اے 48 جمشید مغل سمیت تحریک انصا ف اسلام آباد کی تمام قیادت نے بھرپورحصہ لیا۔

(جاری ہے)

اس موقع پر شہزاد گل کا کہنا تھا کہ وفاقی حکومت اسلام آباد میں پانی جیسا بنیادی مسئلہ حل کرنے میں بری طرح ناکام ہو چکی ہے۔

یومیہ پانی کی ضرورت پورے کرنے کے لیے 150MGD پانی درکار ہے جبکہ سپلائی صرف 50MGDمل رہی ہے اور عوام کو ٹینکرز مافیہ کے ہاتھوں یرغمال بنا دیا گیا ہے۔ منسٹر کیڈ ڈاکٹر طارق فضل چوہدری اپنے کیے گئے جھوٹے وعدوں سے عوام کو بیوقوف بنا رہے ہیں۔ تحریک انصاف مطالبہ کرتی ہے کہ منسٹر کیڈ اپنے وعدوں کے مطابق پانی کے مسئلے کو ہنگامی بنیادوں پر حل کریں بصورت دیگر پی ٹی آئی آیئندہ لائحہ عمل کا اعلان جلد کرے گی۔