محمد میاں سومرو کی زیر صدارت یوتھ فورم فار کشمیرکا اجلاس

لاہور(اُردو پوائنٹ اخبارتازہ ترین - این این آئی۔ 02 اپریل2017ء) سابق وزیر اعظم پاکستان و چیئرمین سینٹ محمد میاں سومرو کی زیر صدارت یوتھ فورم فار کشمیر کا اہم اجلاس منعقد ہوا۔اجلاس میں بھارتی افواج کی جانب سے کشمیر میںمسلسل انسانی حقوق کی خلاف ورزیوں کی شدید مذمت کی گئی اور بے گناہ معصوم کشمیریوں پر ظلم و تشدد اور بلا جواز فائرنگ کرنے پر شدید احتجاج کیا گیا ۔

اجلاس میں اس امر پر سخت افسوس کا اظہار کیا گیا کہ بھارتی افواج نہتے کشمیریوں کے ساتھ ساتھ خواتین اور بچوں کو بھی ظلم و جبر کا نشانہ بنا رہے ہیں ،کشمیر میں بھارتی افواج کی جانب سے بچوں کی سرعام تذلیل کی جارہی ہے اور حالیہ ایک واقعہ میں معصوم کشمیری بچے کو چو راہے پر مرغابنا کر انسانیت کی تذلیل کی گئی ۔

(جاری ہے)

اجلاس سے خطاب کرتے ہوئے محمد میاں سومرو نے کہا کہ عالمی برادری قابض مسلح بھارتی افواج کی ان شرم ناک حرکتوں کا نوٹس لیں ،آزادی کی تحریک کو کچلنے کے لئے قابض بھارتی فوج وادی میں انسانیت سوز مظالم ڈھا رہی ہے۔

بھارتی وزیر اعظم نریندر مودی کے کشمیر کے دورہ کے موقع پر پوری وادی کشمیر میںشٹر دائون ہڑتال کر کے کشمیریوں نے نفرت کا اظہار کیا ہے ۔محمد میاں سومرو نے کہا کہ کشمیروں کو انفراسٹکچر نہیںبلکہ اقوام متحدہ کی منطور کردہ قراردوں کے مطابق انکو "حق خود ارادیت "دیا جائے تاکہ کشمیر عوام امن و سلامتی سے زندگی گزار سکیں، کشمیری آزادی سے کم کسی بات پر سمجھوتے کیلئے تیار نہیں ہیں ۔اجلاس میں یوتھ فورم فار کشمیر کے رہنمائوں طارق احسان غوری ،نواب ریاض حسین قریشی،قسور سعید مرزا،راجہ مجاہد،ملک مہربان ،ڈاکٹر رابعہ خان سمیت دیگر شریک ہوئے۔