سرینگر‘کٹھ پتلی انتظامیہ نے مارچ کو ناکام بنانے کیلئے سخت بندیاں عائد کر دیں

سرینگر(اُردو پوائنٹ اخبارتازہ ترین - این این آئی۔ 21 مئی2017ء) مقبوضہ کشمیر میں کٹھ پتلی انتظامیہ نے اتوار کے روز سرینگر میں مزار شہداء عید گاہ کی طرف ایک مارچ کو ناکام بنانے کیلئے سخت بندیاں عائد کر دیں۔کشمیر میڈیا سروس کے مطابق مارچ کی کال مشترکہ مزاحمتی قیادت نے ممتاز کشمیری آزادی پسند رہنمائوں میر واعظ مولوی محمد فاروق ، خواجہ عبدالغنی لون اور شہدائے حول کی شہادت کی برسیوں کے موقع پر دی تھی۔

قابض انتظامیہ نے لوگوں کو مارچ سے روکنے کیلئے شہر میں بھارتی فوجیوں اور پولیس اہلکاروں کی ایک بڑی تعداد تعینات کر دی تھی ۔انتظامیہ نے حریت فورم کے چیئرمین میر واعظ عمر فاروق کو مارچ کی قیادت سے روکنے کیلئے سرینگر میںگھر میں نظر بند کر دیا تھا۔ کل جماعتی حریت کانفرنس کے چیئرمین سیدعلی گیلانی پہلے سے اپنی رہائش گاہ میں نظر بند ہیں۔

(جاری ہے)

دریںاثنا میر واعظ مولوی محمد فاروق ، خواجہ عبدالغنی لون اور شہدائے حول کی برسیوں پر اتوار کو مقبوضہ علاقے میں مکمل ہڑتال کی گئی۔ تمام دکانیں اور کاروباری مراکز بند رہے جبکہ سڑکوں پر ٹریفک معطل تھی۔ یا د رہے کہ میر واعظ مولوی محمد فاروق کو 21مئی 1990 کو نامعلوم مسلح افراد نے سرینگر میں انکی رہائش گاہ میں گھس کر گولی مار دی تھی جس سے وہ موقع پر ہی شہید ہو گئے تھے۔ بھارتی فوجیوں نے اسی دن سرینگر کے علاقے حول میں ان کے جنازے پر اندھا دھند فائرنگ کر کے 70سوگواروں کو قتل کر دیا تھا۔ خواجہ عبدالغنی لون کو 21مئی 2002 کو نامعلوم حملہ آوروں نے اس وقت شہید کر دیا تھاجب وہ مزار شہداء سرینگر میں ایک عوامی اجتماع سے خطاب کے بعد واپس آرہے تھے۔