خالد لطیف نہ صرف خود مبینہ طور پر بک میکر سے ملے بلکہ شرجیل کی بھی ملاقات کرائی ، تفضل رضوی

ْ لاہور(اُردو پوائنٹ اخبارتازہ ترین - آن لائن۔ 22 مئی2017ء) پاکستان کرکٹ بورڈ کے قانونی مشیر تفضل حیدر رضوی کا کہنا ہے کہ پی ایس ایل سپاٹ فکسنگ سکینڈل میں مبینہ طور پر ملوث کرکٹر خالد لطیف نہ صرف خود مبینہ طور پر بک میکر سے ملے بلکہ انھوں نے ساتھی کرکٹر شرجیل خان کی بھی ان سے ملاقات کرائی۔تفضل حیدر رضوی نے پیر کو ٹریبونل کی سماعت کے بعد میڈیا سے بات کرتے ہوئے کہا کہ ٹریبونل نے خالد لطیف کے وڈیو انٹرویوز تفصیل سے دیکھے ہیں جن میں خالد لطیف نے مبینہ طور پر بک میکر سے ملنے کا اعتراف کیا ہے۔

پاکستان کرکٹ بورڈ کے قانونی مشیر کا کہنا ہے کہ ٹریبونل کے سامنے پیش کیے گئے وڈیو انٹرویوز میں خالد لطیف یہ اعتراف کرتے ہیں کہ انھیں معلوم تھا کہ وہ پہلے بھی (آٹھ فروری کی رات) ایک بکی سے ملے اور پھر نو فروری کو وہ شرجیل خان کو اسی بکی سے ملوانے لے گئے حالانکہ انھیں آٹھ فروری کو ہی بکی کی جانب سے پیشکش ہوگئی تھی لیکن انھوں نے اس بارے میں بورڈ کومطلع نہیں کیا بلکہ دوسرے کرکٹر کو بھی اس بکی سے ملوایا۔

(جاری ہے)

تفضل حیدر رضوی کا کہنا ہے کہ ٹریبونل کے سامنے سبز، نارنجی اور سفید رنگوں کی گرپس بھی پیش کی گئیں جو مبینہ طور پر خالد لطیف کیبیٹ پر چڑھی ہوئی تھیں۔پاکستان کرکٹ بورڈ کے قانونی مشیر نے خالد لطیف کے وکیل کی جانب سے ٹریبونل کے بائیکاٹ کے بارے میں کہا 'ٹریبونل کی ابتدائی سماعت کے دوران ہی اعتراضات پیش کردیے جاتے ہیں لیکن 14 مارچ کو ابتدائی سماعت میں خالد لطیف نے اپنا میڈیکل سرٹیفکیٹ پیش کردیا جب کہ 21 مارچ کو ان کے وکیل کی جانب سے کوئی اعتراض سامنے نہیں آیا۔

انھوں نے 14 اپریل کو جو اعتراض کیا وہ مسترد کردیا گیا جس کے بعد وہ ٹریبونل کے سامنے آئے اور پھر 19 مئی کو بائیکاٹ کا اعلان کردیا۔پاکستان کرکٹ بورڈ کے قانونی مشیر کا کہنا ہے کہ خالد لطیف کے وکیل ٹریبونل کی کارروائی میں پیش ہوتے ہیں یا نہیں اس سے کوئی فرق نہیں پڑے گا اور ٹریبونل ان کی غیرموجودگی میں بھی فیصلہ سنا سکتا ہے۔۔