اے پی ایم ایل نے چترال سے پیپلز پارٹی کی اہم وکٹ اڑا لی، پی پی پی کے نامزد امیدوار سلطان وزیر خان کا پارٹی میں شمولیت کا اعلان

اسلام آباد (اُردو پوائنٹ اخبارتازہ ترین - آن لائن۔ 28 مئی2017ء) آل پاکستان مسلم لیگ (اے پی ایم ایل )نے چترال سے پیپلز پارٹی کی اہم وکٹ اڑا لی، بلاول بھٹو زرداری کے چترال سے نامزد امیدوار سلطان وزیر خان نے اے پی ایم ایل میں شمولیت کا اعلان کردیاگزشتہ روز سابق بیوروکریٹ اور چترال سے پیپلز پارٹی کے اہم راہنما سلطان وزیرخان نے اے پی ایم ایل کے مرکزی دفتر میں پارٹی سکرٹری جنرل ڈاکٹر محمدامجد سے ملاقات کی۔

دوران ملاقات انہوں نے اے پی ایم ایل کے سربراہ سید پرویز مشرف سے ٹیلی فونک گفتگو کی اور آل پاکستان مسلم لیگ میں باقاعدہ شمولیت کا اعلان کردیا۔بعد ازاں انہیں اے پی ایم ایل چترال کا صدر مقررکردیا گیا۔اس موقع پر آل پاکستان مسلم لیگ کے مرکزی نائب صدر محمد ریاض خان اور مرکزی چیف آرگنائزر سید فقیر حسین بخاری بھی موجود تھے۔

(جاری ہے)

واضح ہو کہ سلطان وزیر خان پیپلز پارٹی چترال کے اہم راہنما رہے ہیں جبکہ پیپلز پارٹی کے چیئرمین بلاول بھٹو زرداری نے بذات خود انہیں چترال سے امیدوار نامزد کیاتھا۔

اے پی ایم ایل کے راہنما?ں نے انہیںپارٹی میں شمولیت پر خوش آمدید کہا اور امید ظاہر کی کہ ان کی شمولیت سے اے پی ایم ایل چترال مزید مضبوط،فعال اور منظم ہوگی۔پارٹی راہنما?ں سے گفتگو میں سلطان وزیر خان نے کہا کہ ملکی تاریخ میں چترالی عوام کے مسائل سب سے زیادہ سید پرویز مشرف نے حل کئے۔ چترالی عوام آج بھی انہیں یاد کرتے ہیں۔ لواری ٹنل علاقہ کے عوام کی بنیادی ضرورت تھی۔

تب چترال کے لوگ چھ چھ ماہ تک بیرونی دنیا سے منقطع رہتے تھے۔سید پرویز مشرف کو اس بات کا احساس ہوا اور انہوں نے اس منصوبے پر کام شروع کیاجو اب تکمیل کے آخری مراحل میں ہے۔انہوں نے کہا کہ گو کہ آج کے حکمران اس کا افتتاح کر کے اپنے نام کی تختی لگا رہے ہیں مگر چترالی عوام اچھی طرح یہ بات جانتے ہیں کہ لواری ٹنل سید پرویز مشرف کا کارنامہ ہے۔

ان کا کہنا تھا کہ سید پرویز مشرف کے بعد آنے والے حکمرانوں نے چترالی عوام کو یکسر فراموش کردیا یہی وجہ ہے کہ انہوں نے سید پرویز مشرف کی قیادت پر اعتماد کا اظہار کرتے ہوئے آل پاکستان مسلم لیگ میں شمولیت کا اعلان کیا ہے۔انہوں نے کہا کہ وہ چترال کے گھرگھر میں اے پی ایم ایل کا پیغام پہنچائیں گے اور چترالی عوام ایک مرتبہ پھر سے کامیابی کا سہرا سید پرویز مشرف کے سر باندھیں گے۔