پاکستان اور ایران سعودی عرب اور قطر کے درمیان سفارتی کشیدگی کے خاتمے کے لئے کردار ادا کریں، سینیٹر سراج الحق

منگل 6 جون 2017 13:15

اسلام آباد ۔ (اُردو پوائنٹ اخبارتازہ ترین - اے پی پی۔ 06 جون2017ء) جماعت اسلامی کے امیر سینیٹر سراج الحق نے کہا ہے کہ پاکستان اور ایران سعودی عرب اور قطر کے درمیان سفارتی کشیدگی کے خاتمے کے لئے کردار ادا کریں، استماری ممالک نے مستقبل میں اسلامی ممالک کو لڑانے کے لئے جو نقشہ بنایا ہے وہ اس پر عمل کرر ہے ہیں۔ منگل کو پارلیمنٹ ہائوس کے باہر میڈیاسے گفتگو کرتے ہوئے انہوں نے کہاکہ ماضی میں اسلامی ممالک پر مغربی ممالک کا قبضہ تھا اس قبضے کو طویل جدوجہد کے ذریعے ختم کرایاگیا۔

اسلامی ممالک کے اندر وسائل پر دشمن کا قبضہ ہے۔

(جاری ہے)

ہر اسلامی ملک میں امریکا نے اپنی فوج بٹھائی ہوئی ہے ۔ انہوں نے کہاکہ استماری ممالک نے مستقبل میں اسلامی ممالک کا جو نقشہ بنایا ہے وہ اس پر عمل کررہے ہیں۔ مسلمانوں کو مسلک اور لسانی بنیادوں پر آپس میں لڑانا مغرب کا پرانا ایجنڈا ہے۔ دونوں ممالک کو نہ صرف اسلامی دنیا میں بلکہ عالمی سطح پر بھی ان کاایک مقام ہے ۔دونوں ممالک اسلامی ممالک کے درمیان تنازعات کو ختم کرنے کے لئے اپنی کوششوں کو تیز کریں اور ایک بڑے بھائی کاکردار ادا کریں۔ ایک سوال کے جواب میں انہوں نے کہاکہ نہال ہاشمی نے پہلے تقریر کی پھر استعفیٰ دیا پھر معافی مانگی اب ان کا استعفیٰ واپس لینا سمجھ سے بالا تر ہے۔