مشہور پولو کھلاڑی صوفی محمد عامر یورپ میں انٹرنیشنل مقابلوں میں شرکت کے بعد وطن واپس پہنچ گئے

اتوار 11 جون 2017 16:50

لاہور (اُردو پوائنٹ اخبارتازہ ترین - این این آئی۔ 11 جون2017ء) پاکستان کے مشہور پولو کھلاڑی صوفی محمد عامر یورپ میں انٹرنیشنل پولو کے مقابلوں میں شرکت کے بعد وطن واپس پہنچ گئے۔ تفصیلات کے مطابق پاکستان کی ورلڈکپ ٹیم کے ممبر اور سینئر پولو کھلاڑی صوفی محمد عامر پاکستان میں پولو سیزن کے اختتام کے بعد دورہ یورپ میں ہنگری، سلواکیہ اور ویانا میں پولو کھیل کر وطن واپس پہنچ گئے۔

اپنے دورے کے پہلے مرحلے میں صوفی عامر نے ہنگری میں ٹورنامنٹ کھیلا جس میں انہوں نے آٹھ گول کیے اور ان کی ٹیم فائنل تک پہنچی۔ دوسرے مرحلے میں صوفی محمد عامر نے سلواکیہ میں پولو ٹورنامنٹ کھیلا جس میں ان کی ٹیم نے اچھے کھیل کا مظاہرہ کیا۔ تیسر ے مرحلے پر ویانا میں پولو ٹورنامنٹ کھیلا۔

(جاری ہے)

میڈیا سے گفتگو کرتے ہوئے ٹیم ماسٹر پینٹس کے کپتان صوفی محمد عامر کاکہنا تھا کہ پولو ان کے خون میں رچ بس گئی ہے، پولو دنیا میں کہیں بھی کھیلنے کا موقع ملے تو وہ ضرور کھیلنے جاتے ہیں۔

ان کا کہنا تھا کہ پاکستان میں اعلیٰ کوالٹی کی پولو کھیلی جاتی ہے۔ گزشتہ کئی سال سے یورپ میں پولو کھیل رہا ہوں۔ عید کے بعد ارجنٹائن میں دو ٹورنامنٹ کھیلنے کیلئے روانہ ہوں گا۔ واضح رہے کہ صوفی محمد عامر کا تعلق پولو فیملی سے ہے۔ ان کے بڑے بھائی صوفی محمد حارث اور چھوٹے بھائی فاروق امین صوفی بھی پولو کے کھلاڑی ہیں جبکہ بیٹا اور بھتیجا بھی پولو کھیلتے ہیں۔