سیلاب اور لوڈشیڈنگ سے مستقل و مکمل نجات کالا باغ ڈیم سے ہی ممکن ہے، صدر پاکستان کسان بورڈ پنجاب

بدھ 12 جولائی 2017 18:49

فیصل آباد۔ (اُردو پوائنٹ اخبارتازہ ترین - اے پی پی۔ 12 جولائی2017ء) پاکستان کسان بورڈ پنجاب کے صدرڈاکٹر عبدالجبارخان نے کہاہے کہ سیلاب اور لوڈشیڈنگ سے مستقل و مکمل نجات کالا باغ ڈیم کی تعمیر سے ہی ممکن ہے ۔

(جاری ہے)

میڈیاسے بات چیت کے دوران انہوںنے کہاکہ ہرسال آنے والے سیلاب سے بچاؤ ، پانی کی کمی کو پورا کرکے زمینوں کو آباد کرنے اور لوڈشیڈنگ سے نجات کیلئے کالا باغ ڈیم کی تعمیر فوری شروع کرنا وقت کی اہم ترین ضرورت ہے جس سے نہ صرف ہر سال بہت بڑے سیلابی جانی و مالی نقصانات سے بچاجاسکتاہے بلکہ سستی بجلی پیداکرنے کے علاوہ زراعت کیلئے وافر پانی کا حصول بھی ممکن بنایاجاسکتاہے۔

انہوں نے کہا کہ کالا باغ ڈیم کی تعمیر نہ ہونے کی وجہ سے ہرسال 26ملین ایکڑ فٹ پانی سمندر میں بہہ کر ضائع ہوجاتا ہے ۔انہوںنے کہاکہ اگر کالا باغ ڈیم تعمیر ہوجائے تو اس سے صوبہ سندھ کی 8لاکھ ایکڑ، خیبرپختونخواہ کی ساڑھے 4 لاکھ ایکڑ ، بلوچستان کی 5لاکھ ایکڑ جبکہ صوبہ پنجاب کی 6لاکھ 80ہزار ایکڑ اضافی زمین زیرکاشت آسکتی ہے جبکہ اس سی3600میگا واٹ سستی اور اضافی بجلی بھی حاصل ہوگی۔