طاقتور پاکستان دنیا میں بہت سے لوگوں کے سینے پر مونگ دلتا ہے ، آزاد علی تبسم

پیر 17 جولائی 2017 14:36

لاہور (اُردو پوائنٹ اخبارتازہ ترین - آن لائن۔ 17 جولائی2017ء) پاکستان مسلم لیگ ن کے رہنما و رکن پنجاب اسمبلی آزاد علی تبسم نے کہاہے کہ وزیراعظم محمد نوازشریف ملک کو ترقی کی جانب لے جارہے ہیں جبکہ پی ٹی آئی کے سربراہ عمران خان راستے میں روڑے اٹکا رہے ہیں، عمران خان میں سیاسی بالیدگی نہیں ہے ، ہم پاکستان کو آگے لے کرجانا چاہتے ہیں جبکہ عمران خان اس کو پیچھے کی طرف دھکیل رہے ہیں۔

انہوں نے کہا کہ عمران خان الیکشن کے ایک سال بعد کنٹینر پرچڑھے بعد میں اس ڈرامے کا اختتام ہوا، صحافیوں سے گفتگو کرتے ہوئے انہوں نے کہا کہ ہم گالیوں کا جواب گالیوں سے نہیں دے رہے ، طاقتور پاکستان دنیا میں بہت سے لوگوں کے سینے پر مونگ دلتا ہے ، پاکستان با صلاحیت ہے اگر ہم اپنے پائوں پر کھڑے ہوگئے تو ملک بہت آگے جائے گا، یہ تلخ حقیقت ہے کہ پاکستان کی سالمیت کے خلاف بیرونی سازشیں کی گئیں ۔

(جاری ہے)

انہوں نے کہا کہ جے آئی ٹی رپورٹ کے شدید اعتراضات ہیں اور ہمارے وکلاء ان پرکام کررہے ہیں ، جے آئی ٹی کے خلاف تحفظات کے باوجود بھی مسلسل پیش ہوتے رہے کیونکہ قانون کی جنگ عدالت میں لڑی جاتی ہے،فیصلہ حق میں آئے یا نہ آئے اسے ماننا پڑتا ہے اور قانون کے فیصلے کو سب کو ماننا ہوگا تاکہ ملک آگے بڑھے۔ انہوں نے کہا کہ ہم گالیوں کا جواب گالیوں سے نہیں دے رہے ۔