سندھ حکومت نے آبادگاروں کو دیوار سے لگا دیا ہے، رہنماء جماعت اسلامی

گذشتہ سال آبادگاروں کے لیے سبسڈی دیکر سستے ٹریکٹر دینے کا بجٹ میں اعلان کیا مگر ٹریکٹر آبادگاروں کے بجائے پنجاب اور کے پی کے کے ڈیلروں کو فروخت کردئیے گئے

بدھ 16 اگست 2017 22:35

جیکب آباد(اُردو پوائنٹ اخبارتازہ ترین - آئی این پی۔ 16 اگست2017ء) جماعت اسلامی سندھ کے رہنما عبدالحفیظ بجارانی نے کہا ہے کہ سندھ بنیادی طور پر ایک زرعی صوبہ ہے مگر سندھ حکومت نے آبادگاروں کو دیوار سے لگا دیا ہے، گذشتہ سال آبادگاروں کے لیے سبسڈی دیکر سستے ٹریکٹر دینے کا بجٹ میں اعلان کیا مگر وہ ٹریکٹر آبادگاروں کے بجائے پنجاب اور کے پی کے کے ڈیلروں کو فروخت کردئیے گئے ستم ظریفی یہ ہے کہ اس میگا کرپشن پر کسی ادارے نے سندھ حکومت سے پوچھا تک نہیں ،انہوں نے کہا کہ محسوس تو یہ ہوتا ہے کہ سندھ میں سارے ادارے چھپ ہوگئے ہیں اور جنگل کا قانون ہے ،انہوں نے کہا کہ سندھ کے آبادگاروں سے ایک طرف سندھ حکومت کا ناروا اور ظالمانہ سلوک ہے تو دوسری جانب آبادگاروں کو پیسٹی سائیڈ کمپنیاں لوٹ رہی ہیں غیر معیاری ادویات اور بیج نے سندھ کے آبادگاروں کو زمین بیچنے پر مجبور کردیا ہے ،انہوں نے کہا کہ ٹریکٹر اسکیم میں کرپشن پر سندھ ہائی کورٹ سوموٹو نوٹس لے کر ملوث افراد کے خلاف کارروائی کی جائے اور آبادگاروں کے ساتھ انصاف کیا جائے۔