حج پرواز کی روانگی سے قبل مصری حاجی کی روح پرواز کرگئی

شہری کی ناگہانی موت کی بنا پر جہاز اپنے مقررہ وقت سے ڈیڑھ گھنٹہ تاخیر سے روانہ ہوا

اتوار 20 اگست 2017 13:10

ریاض (اُردو پوائنٹ اخبارتازہ ترین - این این آئی۔ 20 اگست2017ء) حج کے سفر کے دوران حجاج کرام کی وفات کی خبریں آتی رہتی ہیں مگر بعض اموات ایسی بھی ہوتی ہیں جو عالمی توجہ کا مرکز بن جاتی ہیں۔ ایسی ہی ایک موت ایک مصری عازم حج کی ہے جو احرام باندھ کر سعودی عرب کے ہوائی جہاز میں سوار ہوا مگر جہاز کے ٹیک آف کرنے سے قبل ہی وہ احرام کی حالت میں دم توڑ گیا۔

عرب ٹی وی کے مطابق 26 سالہ الحاج مصطفیٰ السید حسوبہ احرام باندھ کر قاہرہ سے جدہ آنے والی سعودی ایئرلائن کی پرواز 386 پر سوار ہوا۔

(جاری ہے)

احرام باندھ کر طیارے میں سوار ہونے کے کچھ ہی دیر بعد اس کے جسم میں خون کی گردش میں شدید کمی کے باعث اس کی موت واقع ہوگئی۔طیارے کے پائلٹ کو بتایا گیا کہ جہاز میں سوار ہونے والا ایک مسافر بے ہوش ہوگیا ہے جس پر ڈاکٹر کو طلب کیا گیا۔ قاہرہ کے ہوائی اڈے کے ڈاکٹر نے مسافر کا معائنہ کیا تو پتا چلا کہ خون کی گردش رکنے کے باعث اس کی موت واقع ہوچکی ہے۔ اس کے بعد احرام کی حالت میں اس کی میت جہاز سے اتار کر ورثاء کے حوالے کردی گئی۔ جہاز میں شہری کی ناگہانی موت کی بنا پر جہاز اپنے مقررہ وقت سے ڈیڑھ گھنٹہ تاخیر سے روانہ ہوا۔