چینی سفیر کی ملتان میٹرو بس پروجیکٹ میں کرپشن کی تردید

جعلی چینی کمپنی کے ذریعے ملتان میٹرو بس پروجیکٹ میں شہباز شریف کے رشوت لینے کے حوالے سے رپورٹس غلط ہیں ،ْلی جیان ژائو

جمعہ 1 ستمبر 2017 17:50

اسلام آباد (اُردو پوائنٹ اخبارتازہ ترین - این این آئی۔ 01 ستمبر2017ء) پاکستان میں چین کے قائم مقام سفیر لی جیان ژاؤ نے وزیراعلیٰ پنجاب کیخلاف کرپشن الزامات کی تردید کرتے ہوئے کہا ہے کہ جعلی چینی کمپنی کے ذریعے ملتان میٹرو بس پروجیکٹ میں شہباز شریف کے رشوت لینے کے حوالے سے رپورٹس غلط ہیں۔سماجی رابطے کی ویب سائٹ ٹوئٹر پر اپنے پیغام میں قائم مقام چینی سفیر لی جیان ژاؤ کا کہنا تھا کہ چینی کمپنی 'یابیٹ' پاکستان میں آپریٹ نہیں کر رہی اور اس نے حکومت کو دھوکا دینے لیے جعلی خطوط پیش کیے۔

(جاری ہے)

ان کا کہنا تھا کہ چینی حکومت مذکورہ کمپنی کے خلاف ایکشن لے چکی ہے۔واضح رہے کہ رواں ہفتے منگل 29 اگست کو نجی چینل نے اپنی رپورٹ میں الزام عائد کیا تھا کہ چائینیز ریگولیٹری اتھارٹی نے ایک رپورٹ جاری کی ہے جس کے مطابق ملتان میٹرو بس پروجیکٹ کے سلسلے میں چینی کمپنی یابیٹ کے ذریعے وزیراعلیٰ پنجاب شہباز شریف نے ایک کروڑ روپے رشوت حاصل کی تاہم وزیراعلیٰ پنجاب شہباز شریف نے اگلے روز ایک پریس کانفرنس کے دوران ان الزامات کی تردید کرتے ہوئے کہا تھا کہ 1997 سے لے کر آج تک تین ادوار میں اگر میری ذات کے خلاف سرکاری ذمہ داریاں نبھاتے ہوئے ایک دھیلے کی کرپشن بھی ثابت ہوجائے تو قوم کا ہاتھ اور میرا گریبان ہوگا۔