خیبرپختونخوا کے عوام ڈینگی بخار میں تڑپ رہے ہیں ،عمران خان لندن کے سیرسپاٹے کر رہے ہیں،فیصل کریم کنڈی

اسلام آباد(اُردو پوائنٹ اخبارتازہ ترین - این این آئی۔ 10 ستمبر2017ء) پاکستان پیپلزپارٹی پارلیمنٹرینز کے سابق ڈپٹی سپیکر قومی اسمبلی اورپاکستان پیپلزپارٹی کے پی کے جنرل سیکریٹری فیصل کریم کنڈی نے کہا ہے کہ خیبرپختونخوا کے عوام ڈینگی بخار میں تڑپ رہے ہیں اور عمران خان لندن کے سیرسپاٹے کر رہے ہیں۔ ایک بیان میں فیصل کریم کنڈی نے کہا کہ سرکاری ہسپتالوں کی حالت یہ ہے کہ وہاں معروف اداکار افتخار قیصر نو گھنٹے تک ہسپتال کے برآمدے میں پڑے رہے کوئی ڈاکٹر نہیں آیا۔

انہوں نے کہا کہ کے پی کے عوام پی ٹی آئی کی اصلیت کو پہچان چکی ہے۔ عمران خان اور ان کی پارٹی کا عوام سے نہ کوئی سروکار ہے اور نہ ہی رشتہ کیونکہ پی ٹی آئی کو ملنے والا مینڈیٹ عوام کا نہیں بلکہ حکیم اللہ محسود کا تھا۔

(جاری ہے)

فیصل کریم کنڈی نے کہا کہ پی ٹی آئی کے پی کے عوام کا خون چوس رہی ہے۔ صوبائی حکومت کے پاس نہ تعمیرات کے لئے پیسے ہیں، نہ تعلیم کے لئے اور نہ ہی صحت کے لئے۔

عوام کا پیسہ خلائوں میں درخت اگانے کے نام پر چوری کیا جا رہا ہے۔ فیصل کریم کنڈی نے کہا کہ جو شخص ڈینگی مچھر کے خوف سے پشاور آنے سے ڈرتا ہو وہ عوام کا لیڈر کیسے بن سکتا ہی انہوں نے کہا کہ پاکستان پیپلزپارٹی صدر آصف علی زرداری اور چیئرمین بلاول بھٹو زرداری کی قیادت میں کے پی کے عوام کی خدمت کرے گی۔ صدر آصف علی زرداری نے پختون عوام کو شناخت دی تھی اور عوام کو یہ یقین دلاتی ہے کہ وہ اقتدار میں آکر عوام کے لئے روزگار، تعلیم اور صحت کے لئے بھرپور اقدامات اٹھائے گی۔