ماہ جولائی میں خام تیل اور پیٹرول کی درآمد میں اضافہ:فرنس آئل اور ڈیزل میں کمی

اتوار 17 ستمبر 2017 18:20

اسلام آباد (اُردو پوائنٹ اخبارتازہ ترین - آن لائن۔ 17 ستمبر2017ء) نئے مالی سال کے پہلے ماہ جولائی کے دوران خام تیل اور پٹرول کی در آمد میں اضافہ دیکھا گیا جبکہ فرنس آئل اور ڈیزل کی در آمد میں کمی دیکھی گئی۔ میڈیا رپورٹ کے مطابق گزشتہ ماہ جولائی کے دوران خام تیل کی در آمد 25 فیصد اضافے سے 8 لاکھ 88 ہزار ٹن کے قریب رہی جس میں سے ایک لاکھ71 ہزار 510 ٹن خام تیل بائیکو کی سنگل پوائنٹس مورنگ پر در آمد کیا گیا۔

(جاری ہے)

جون میں خام تیل کی در آمد 7 لاکھ 8 ہزار ٹن سے زائد رہی تھی جس میں سے ایک لاکھ37 ہزار661 ٹن خام تیل بائیکو ریفائنری کی جانب سے در آمد کیا گیا تھا۔ رپورٹ کے مطابق مقامی ریفائنریوں کی پیداواری استعداد میں اضافے کے باعث گزشتہ ماہ خام تیل کی در آمد میں اضافہ رہا۔پٹرول کی در آمد گزشتہ ماہ 19فیصد اضافے سے 4 لاکھ 44 ہزار ٹن کے لگ بھگ رہی جبکہ جون میں پٹرول کی در آمد 3 لاکھ 72ہزار ٹن سے زائد رہی تھی، طیاروں میں استعمال ہونے والے ایندھن جیٹ فیول کی در آمد گزشتہ ماہ106فیصد اضافے سے 21673ٹن رہی جبکہ جون میں 10493ٹن جیٹ فیول در آمد کیا گیا تھا۔