سری لنکا کے خلاف ٹیسٹ سیریز کیلئے کھلاڑیوں کا تربیتی کیمپ ختم،یاسر شاہ فٹ قرار

پرفارمنس بہتر بنانے،کمزوریاں دور کرنے پر توجہ دی گئی،احمد شہزاد اوررضوان ڈراپ

ہفتہ 23 ستمبر 2017 16:41

لاہور۔ (اُردو پوائنٹ اخبارتازہ ترین - اے پی پی۔ 23 ستمبر2017ء) سری لنکا کے خلاف ٹیسٹ کرکٹ سیریز میں حصہ لینے والے 18 قومی کھلاڑیوں کا تربیتی کیمپ ہفتہ کے روز قذافی سٹیڈیم لاہور میں ختم ہوگیا،کیمپ میں آخری روزکھلاڑیوں نے وارم اپ کے علاوہ فٹ بال کی پریکٹس کی نیز ہیڈ کوچ مکی آرتھر نے کھلاڑیوں کو لیکچر دیئے جبکہ ٹیم مینجمنٹ کا کہنا تھا کہ کیمپ میں کھلاڑیوں کی پرفارمنس کو بہتر بنانے اور کمزوریاں دور کرنے پر توجہ دی گئی،یاسر شاہ کا فٹنس ٹیسٹ بھی ہوا جس میں ان کی فٹنس 17.

(جاری ہے)

5تھی جس پر انہیں فٹ قرار دیدیا گیا،کیمپ میں 18کھلاڑیوں نے شرکت کی جن میں اظہر علی ،شان مسعود ،احمد شہزاد ،سمیع اسلم ،بابر اعظم ،اسد شفیق ،حارث سہیل ،عثمان صلاح الدین ،سرفراز احمد ( کپتان )محمد رضوان ،یاسر شاہ ،محمد اصغر ،بلال آصف ،میر حمزہ ،محمد عامر ،حسن علی ،محمد عباس اور وہاب ریاض شامل ہیں تاہم بعد ازاں دو کھلاڑیوں احمد شہزاد اور محمد رضوان کو ڈراپ کرکے 16رکنی اسکواڈ کا اعلان کیا گیا ،پاکستان اور سری لنکا کے درمیان دو ٹیسٹ، پانچ ون ڈے اور تین ٹی20 میچوں کی سیریز کا آغاز رواں ماہ 28 ستمبرکو ابوظہبی میں ہونے والے پہلے ٹیسٹ سے ہو گا۔