صوبائی حکومتیں نوجوانوںکو سنوکر اور بلیئرڈ کی طرف راغب کرنے کے لئے ایونٹس کا انعقاد کریں، قومی اسمبلی کی قائمہ کمیٹی بین الصوبائی رابطہ کی تجویز

بدھ 4 اکتوبر 2017 15:50

اسلام آباد ۔ (اُردو پوائنٹ اخبارتازہ ترین - اے پی پی۔ 04 اکتوبر2017ء) قومی اسمبلی کی قائمہ کمیٹی بین الصوبائی رابطہ نے تجویز دی ہے کہ صوبائی حکومتوں اور تمام صوبوں کی ضلعی انتظامیہ کو چاہیے کہ وہ نوجوانوںکو سنوکر اور بلیئرڈ کی طرف راغب کرنے کے لئے ایونٹس کا انعقاد کریں۔ قائمہ کمیٹی کا اجلاس کمیٹی کے چیئرمین عبدالقہار خان ودان کی سربراہی میں ہوا جس میں پاکستان بلیئرڈ اینڈ سنوکر فیڈریشن ( پی بی ایس ایف) کے معاملات اور ان کے مستقبل کے لائحہ عمل پر بحث کی گئی۔

پی بی ایس ایف کے چیئرمین نے فیڈریشن کی کامیابیوں اور مقاصد کے حوالے سے کمیٹی کو آگاہ کیا۔ انہوں نے کہاکہ حال ہی میں پاکستانی کھلاڑیوں نے عالمی علاقائی اور دیگر چیمپین شپ میں 11میڈل حاصل کئے ہیں۔

(جاری ہے)

کمیٹی نے فیڈریشن سے کہاکہ وہ آئندہ اجلاس میں اپنی تمام کاغذی کارروائی مکمل کرکے پیش ہو تاکہ اس پر بحث کرکے اس کا کوئی مؤثر حل تجویز کیا جاسکے۔ اجلاس میں رانا محمد افضل خان ، چوہدری نذیر احمد ، سراج محمد خان ، اقبال محمد علی خان اور خالد حسین مگسی اور وزارت بین الصوبائی کے سینئر حکام ڈائریکٹر جنرل نیشنل انٹرن شپ پروگرام، پاکستان ہاکی فیڈریشن کے صدر ، چیئرمین پاکستان بلیئرڈ اینڈ سنوکر فیڈریشن اور پاکستان سپورٹس بورڈ کے ڈائریکٹر جنرل نے شرکت کی۔