پولیس نے چاقو مار چھلاوے کی آڑ میں بے گناہوں سے پیسے بٹورنے شروع کر دئیے

جمعرات 12 اکتوبر 2017 22:56

کراچی(اُردو پوائنٹ اخبارتازہ ترین - آئی این پی۔ 12 اکتوبر2017ء) خواتین پر چاقو سے حملے کرنے والا پولیس کے لیے کمائی کا ذریعہ بن گیا ہے۔کراچی کے علاقے گلستان جوہر میں 25 ستمبر سے شروع ہونے والی وارداتوں میں اب تک ایک درجن سے زائد خواتین زخمی ہوچکی ہیں جس میں نامعلوم شخص خواتین کو تیز دھار آلے سے زخمی کررہا ہے۔پولیس نے ملزم کی تلاش میں اپنے تمام گھوڑے دوڑا لیے لیکن ملزم چھلاوے کی طرح پولیس کے ہاتھ نہیں آیا۔

تاہم اب یہی ملزم پولیس کے لیے کمائی کا ذریعہ بن گیا ہے اور پولیس اس ملزم کی آڑ میں بے گناہوں کو گرفتار کرکے پیسے بٹور رہی ہے۔کراچی میں خواتین پر حملے کرنیوالا ملزم پکڑا نہ جاسکا۔ذرائع کے مطابق جوڈیشل مجسٹریٹ ساؤتھ نے اینٹی وائلٹ کرائم سیل (اے وی سی سی) گارڈن میں چھاپہ مار کر 7 افراد کو بازیاب کرالیا۔

(جاری ہے)

جوڈیشل مجسٹریٹ کو ایک شخص جمال شاہ نے درخواست دی تھی جس کے دو بیٹوں کو پولیس نے خواتین کو چھرا مارنے کے الزام میں کورنگی سے حراست میں لیا تھا جب کہ اسی شخص کو بھی پولیس اسی الزام میں حراست میں لے چکی تھی اور اسے 5 لاکھ روپے رشوت لے کر چھوڑا گیا۔

جمال شاہ کی درخواست پر جب جوڈیشل مجسٹریٹ نے چھاپہ مارا تو سیل سے 3 کی بجائے 7 افراد کو بازیاب کرایا گیا ہے۔واقعے کے بعد ڈی ایس پی اور 2 انسپکٹروں کوگرفتار کرکے تھانے منتقل کردیا گیا اور ان کے خلاف مقدمہ بھی درج کرلیا گیا ہے۔

Facebook Twitter Google + Share on Whatsapp

پولیس نے چاقو مار چھلاوے کی آڑ میں بے گناہوں سے پیسے بٹورنے شروع کر دئیے

متعلقہ عنوان :

مزید قومی خبریں