میٹرو ٹرین منصوبے کی خوبصورتی اجاگر کرنے کیلئے 55کروڑ روپے سے 27کلومیٹر طویل ٹریک پر سبزہ کاری کی جائیگی ‘ خواجہ احمد حسان

بدھ 18 اکتوبر 2017 16:07

لاہور (اُردو پوائنٹ اخبارتازہ ترین - این این آئی۔ 18 اکتوبر2017ء) وزیر اعلیٰ پنجاب کے مشیر اور سٹیرنگ کمیٹی کے چیئرمین خواجہ احمد حسان نے کہا ہے کہ اورنج لائن میٹرو ٹرین منصوبے کی خوبصورتی اجاگر کرنے کے لئے 55کروڑ روپے کی لاگت سے 27کلومیٹر طویل ٹریک‘26 سٹیشنوں ‘ ڈپو اور سٹیبلنگ یارڈ میں سبزہ کاری اور پودے لگانے کا کام کیا جائے گا، اورنج لائن کے راستے میں ٹھوکر نیاز بیگ چوک اور داروغہ والا جنکشن پر ٹریفک کا نظام بہتر کرنے کے لئے جیو میٹرک پلان تیار کیاجائے،جین مندر سے چوبرجی تک لیک روڈ کی تعمیر مکمل کرنے کے لئے اس پر اسفالٹ کی تہہ بچھائی جائے،پیکیج ون کے دو سٹیشنوں اسلام پارک اور سلامت پورہ کے ساتھ ساتھ پیکیج ٹو کے دو سٹیشنوں بند روڈ اور سبزہ زار کو بھی ماڈل سٹیشن کے طور پر تیار کیا جار ہاہے ،میٹرو ٹرین منصوبہ اختتامی مراحل میں داخل ہو گیا ہے، اس کی فنشنگ بین الاقوامی معیار کے مطابق کرنے کے لئے تمام متعلقہ محکمے مکمل ہم آہنگی سے کام کریں ۔

(جاری ہے)

وہ گزشتہ روز اورنج لائن منصوبے پر پیش رفت کا جائزہ لینے کے سلسلے میں منعقدہ اجلاس کی صدارت کر رہے تھے ۔ اجلاس میںایم پی اے چودھری شہباز ‘ ڈپٹی میئرنذیر خان سواتی ‘ جنرل منیجرآپریشنز پنجاب ماس ٹرانزٹ اتھارٹی سید عزیر شاہ‘ جنرل منیجر نیسپاک سلمان حفیظ اور حسیب خواجہ ‘ چیف انجینئر ٹیپا سیف الرحمن اور لیسکو‘پی ٹی سی ایل ‘سوئی گیس ‘ ریلوے‘ ٹریفک پولیس ‘سول ڈیفنس‘ریسکیو1122 اور دیگر متعلقہ محکموں کے اعلی افسران کے علاوہ منصوبے کے چینی کنٹریکٹر سی آر نورنکو اور چائنہ انجینئر نگ کنسلٹنس کے نمائندوں اور مقامی کنٹریکٹرز نے شرکت کی ۔

اجلاس کو بتایا گیا کہ مجموعی طور پر منصوبے کا 76فیصد تعمیراتی کام مکمل ہو چکا ہے -ڈیرہ گجراں سے چوبرجی تک پیکیج ون کا 86.9 فیصد‘ چوبرجی سے علی ٹائون تک پیکیج ٹو کا 57.2فیصد ‘پیکیج تھری ڈپو کا 80.5فیصد جبکہ پیکیج فور سٹیبلینگ یارڈ کی تعمیر کا 77.8فیصد کام مکمل کیا جا چکا ہے ۔خواجہ احمد حسان نے ہدایت کی کہ تعمیراتی کام والی جگہوں سے گزرنے والی ٹریفک کی متبادل راستوں کی طرف راہنمائی کے لئے سائن بورڈ ز نصب کئے جائیں۔

ہنجر وال اور علی ٹائون سٹیشن کے قریب سڑک کی سطح ہموار کی جائے ۔ کینال ویو سٹیشن کے نواح سے ملبہ ہٹایاجائے ۔ اس کے علاوہ نیپیئر چوک میں سڑکوں کے کھڈے پر کئے جائیں ۔ منصوبے کے چینی کنٹریکٹرز سی آر نورنکو کی طرف سے میٹرو سٹیشنوں پر نصب کئے جائیں والے آلات اور دیگر تنصیبات کی حفاظت کا خاطر خواہ بندوبست کیا جائے ۔

متعلقہ عنوان :