آزاد کشمیر حکومت کنٹرول لائن پر بسنے والے متاثرین کے فوری مسائل حل کرے‘ بھارتی فوج کی گولہ باری سے شہید و زخمی ہونے والوں کو امداد بروقت ملنی چاہیے

سابق معاون خصوصی وزیر اعظم آزاد کشمیر و رہنما پاکستان پیپلز پارٹی چودھری محمد اشرف کی بات چیت

جمعہ 20 اکتوبر 2017 16:36

میرپور(اُردو پوائنٹ اخبارتازہ ترین - آئی این پی۔ 20 اکتوبر2017ء) سابق معاون خصوصی وزیر اعظم آزاد کشمیر و رہنما پاکستان پیپلز پارٹی چودھری محمد اشرف نے کہا کہ آزاد کشمیر حکومت کنٹرول لائن پر بسنے والے متاثرین کے فوری مسائل حل کرئے۔ بھارتی فوج کی گولہ باری سے شہید و زخمی ہونے والوں کو امداد بروقت ملنی چاہیے۔

(جاری ہے)

حکومت نے کنٹرول لائن پر بنکرز بنانے کا وعدہ کیا تھا اور متاثرین کو امداد بھی فراہم کرنے کی یقین دہانی کروائی گئی تھی لیکن کسی پر بھی تا حال عملدرآمد نہیں ہو سکا جو قابل افسوس بات ہے حکومت کی بے حسی سے متاثرین کنٹرول لائن کے مسائل میں اضافہ ہو رہا ہے۔

کشمیری بہادری کے ساتھ دشمن کے سامنے سیسہ پلائی دیوار بنے ہوئے ہیں۔ ان خیالات کا اظہار اُنہوں نے صحافیوں سے گفتگو کرتے ہوئے کیا۔چودھری محمد اشرف نے کہا کشمیریوں کی شہادتیں رائیگاںنہیں جاسکتیں اوراہل کشمیر حق خودارادیت کی منزل حاصل کرکے رہیں گے۔بھارت کے اندر آزادی کی مختلف تحریکیں چل رہی ہیں ۔کشمیری بھی اپنی آزادی کے لیے پر امن تحریک جاری رکھے ہوئے ہیں اور آزادی حاصل ہونے تک یہ تحریک جاری رہے گی۔انہوں نے کہا آزاد حکومت سیاسی گیم سکور نہ کرئے بلکہ متاثرین کنٹرول لائن کی فوری امداد کرئے ۔