غیرمعروف امریکی کمپنی نے سستا ترین ویب کیمرہ متعارف کراد یا

اس کیمرے کی قیمت 100 ڈالر یعنی لگ بھگ پاکستانی 11 ہزار روپے رکھی گئی ہے

اتوار 22 اکتوبر 2017 12:10

واشنگٹن(اُردو پوائنٹ اخبارتازہ ترین - این این آئی۔ 22 اکتوبر2017ء) غیر معروف امریکی کمپنی ’ریزر‘ نے پہلی بار سستا ترین ویب اسٹریمنگ کیمرہ متعارف کرادیا۔خیال رہے کہ ’ریزر‘ مختلف کمپیوٹر و الیکٹرانک آلات تیار کرتی ہے، اس کی تیار کردہ مصنوعات زیادہ تر امریکا میں ہی مقبول ہیں۔17 سال پرانی کمپنی نے اب تک ایسے کوئی معروف آلات متعارف نہیں کرائے جنہوں نے امریکا کے علاوہ دیگر خطوں میں شہرت حاصل کی ہو۔

تاہم اب کمپنی کی جانب سے ویب اسٹریمنگ کیمرہ متعارف کرائے جانے کے بعد خیال کیا جا رہا ہے کہ ’ریزر‘ بھی معروف عالمی کمپنیوں میں شمار ہوگی۔کمپنی کی جانب سے ’ریزر کیو‘ کے نام سے متعارف کرائے گئے پورٹ ایبل مائکروفون ویب اسٹریمنگ کیمرے کا ایچ ڈی رزلٹ 1080 میگا پکسل ہے، جو ایک سیکنڈ میں 30 ایچ ڈی تصاویر کھینچنے کی اہلیت رکھتا ہے۔

(جاری ہے)

ریزر کے ویب اسٹریمنگ کیمرے کی خاص بات یہ ہے کہ یہ کیمرہ پورٹ ایبل ہے، اور اس میں جدید ترین سافٹ ویئرز کا استعمال کیا گیا ہے، جس وجہ سے یہ ہر ڈیوائس کے ساتھ جلد ہی منسلک ہوجاتا ہے۔

چار میگا پکسل کیمرے سے متعلق کمپنی کا دعویٰ ہے کہ اس کے ذریعے براہ راست یوٹیوب نشریات بھی چلائی جاسکتی ہے۔کمپنی کے مطابق پورٹ ایبل ویب اسٹریمنگ کیمرہ کو لیپ ٹاپ سمیت تمام کمپیوٹر ڈیوائسز کے ساتھ منسلک کیا جاسکتا ہے۔کمپنی نے اس ویب اسٹریمنگ کیمرے میں خصوصی رِنگِ نصب کی ہے، جس کی مدد سے کیمرے کو کسی بھی ڈیوائس میں نصب کیا جاسکتا ہے۔

کمپنی نے فوری طور پر اس کیمرے کو آن لائن فروخت کے لیے پیش کردیا ہے، جب کہ اسے رواں برس کے آخر تک دنیا کے مختلف ممالک میں فروخت کے لیے پیش کیا جائے گا۔اس کیمرے کو کن کن ممالک میں فروخت کے لیے پیش کیا جائے گا، اس حوالے سے کمپنی نے کوئی وضاحت نہیں کی، تاہم دنیا بھر کے صارفین اسے آن لائن خرید سکتے ہیں۔اس کیمرے کی قیمت 100 ڈالر یعنی لگ بھگ پاکستانی 11 ہزار روپے رکھی گئی ہے۔

متعلقہ عنوان :