تحریک انصاف نے ملک میں شدت پسندی اور افراتفری کی سیاست کو فروغ دیا ہے، طارق فضل چوہدری

اتوار 22 اکتوبر 2017 19:11

اسلام آباد ۔ (اُردو پوائنٹ اخبارتازہ ترین - اے پی پی۔ 22 اکتوبر2017ء) وزیر مملکت برائے کیڈ ڈاکٹر طارق فضل چوہدری نے کہا ہے کہ پاکستان تحریک انصاف نے ملک میں شدت پسندی اور افراتفری کی سیاست کو فروغ دیا ہے۔

(جاری ہے)

اتوار کو ایک نجی ٹی وی چینل سے بات چیت کرتے ہوئے انہوں نے کہا کہ پی ٹی آئی کے سربراہ عمران خان نے ڈی چوک کے دھرنے کے دوران جمہوری نظام کو ختم کرنے کے لیے ایک سازش کی منصوبہ بندی کی لیکن وہ ایساکرنے میں ناکام رہے۔

انہوں نے کہا کہ پاکستان مسلم لیگ (ن) ملک کی مقبول ترین جماعت ہے جو تمام سیاسی جماعتوں کی عزت کرتی ہے۔ وزیر مملکت کا کہنا تھا کہ پاکستان تحریک انصاف کے دھرنوں کے دوران پاکستان پیپلز پارٹی نے جمہوریت کا ساتھ دیا۔ انہوں نے کہا کہ موجودہ حکومت نے قومی اداروں کے ساتھ محاذ آرائی کی پالیسی اختیار نہیں کی۔