طبی ماہرین خطے کی بیماریوں بارے تحقیق کرکے حفاظتی اقدامات و سستے علاج کے بارے میں عوام کو آگاہ کریں ۔وزیر صحت،ڈینگی فیور کے 80 کنفرم کیسز ہسپتالوں میں آئے ‘70کو علاج معالجہ کے بعد فارغ کر دیا گیا۔ وفد سے گفتگو

لاہور( اردوپوائنٹ اخبار تازہ ترین10نومبر2006 ) وزیر صحت پنجاب ڈاکٹر طاہر علی جاوید نے طبی ماہرین سے کہا ہے کہ وہ اس خطے کی بیماریوں کے بارے میں تحقیق کریں اور ڈینگی وائرس ‘ ہیپاٹائٹس ‘ گیسٹرو اینڈانٹرائٹس او رٹائیفائیڈ وغیرہ کے بارے میں تحقیق کرکے حفاظتی اقدامات و سستے علاج کے بارے میں عوام کو آگاہ کریں ۔طبی ماہرین کے وفد سے ملاقات کے دوران گفتگو کرتے ہوئے ڈاکٹر طاہر علی جاوید نے کہا کہ صوبہ میں اب ڈینگی بخار کی صورتحال بہتر ہورہی ہے اور اب تک صوبہ میں ڈینگی فیور کے 80 کنفرم کیسز علاج معالجہ کے لئے سرکاری ہسپتالوں میں آئے جن میں سے 70کو علاج معالجہ کی مکمل سہولیات فراہم کرنے اور صحت یاب ہونے کے بعد ہسپتالوں سے فارغ کر دیا گیاجبکہ آئندہ چندہفتوں میں اس پر مکمل کنٹرول کرلیاجائے گا ۔

(جاری ہے)

انہو ں نے کہاکہ سرکاری ہسپتالو ں میں آنے والے مریضوں کو تشخیص و علاج معالجہ کی بہترین طبی سہولیات فراہم کی جارہی ہیں ۔ اس سلسلے میں اگر کسی جگہ سے لاپرواہی یا کوتاہی کی شکایت آئی تو اس کی مکمل تحقیقات کی جائیں گی ۔ انہو ں نے کہاکہ اب تک پنجاب میں ڈینگی بخار سے نہ تو کوئی خطرناک صورتحال پیداہوئی ہے اور نہ ہی خوش قسمتی سے اس کے کسی مریض کی موت ہوئی ہے ۔ انہو ں نے کہاکہ اب ڈینگی بخار کے مریضوں میں بتدریج کمی آرہی ہے اور سرکاری ہسپتالوں میں ٹیسٹ کٹس مناسب مقدار میں فراہم کردی گئی ہیں ۔