ارسا نے پنجاب کی درخواست پر چشمہ جہلم لنک کینال کو دوبارہ کھول دیا

جمعرات 15 جولائی 2010 18:47

لاہور (اُردوپوائنٹ اخبارتازہ ترین۔15 جولائی۔2010ء) ارسا نے پنجاب کی درخواست پر چشمہ جہلم لنک کینال کو دوبارہ کھول دیا ہے ۔اس سے پنجاب کو دریا سندھ سے 15ہزار کیوسک پانی دیا جائے گا ۔یہ بات وزیر آبپاشی پنجاب راجہ ریاض احمد نے پنجاب اسمبلی میں اپوزیشن لیڈر کے نکتہ اعتراض کا جواب دیتے ہوئے بتائی۔صوبائی وزیر نے ایوان کو ارسا کی جانب سے سی جے لنک کینال کھولنے کا حکم نامہ بھی دیکھایا۔

اجلاس کے دوران اپوزیشن لیڈر چوہدری ظہیر الدین نے کہا کہ ایوب خان،ضیاء الحق اور پرویز مشرف کی باقیات سے پنجاب اسمبلی بھری پڑی ہے اب ہمیں باقیات کی بجائے آگے کی طرف دیکھنا چاہے ۔ انہوں نے کہاکہ ہمارے دور میں پانچ سال تک ایک بھی دن سی جے کینال بند نہیں ہوئی لیکن آج کی حکومت کی وجہ سے 9ماہ سی جے کینا ل بند رہی اور آج بھی وہ نہر نہیں کھل سکی جبکہ حکومت نے بدھ کے روزدعویٰ کیاتھا کہ آج ہی دوپہر کو سی جے کینال کو کھول دیاجائے گا لیکن تاحال نہیں کھلا گیا انہوں نے کہاکہ ہمارے صوبے کے وزیر اعلیٰ نے صدر زرداری اور وزیر اعظم یوسف رضاگیلانی کے آگے آنکھیں بند رکھی ہوئی ہیں کیونکہ پنجاب کے حکمرانوں نے میں اخلاقی جرات نہیں ہے کہ ان کے آگے بات کریں انہوں نے مرکزکے آگے پنجاب کو دیوالیہ کردیاہے اور مرکزسے قرضے لیکر اپنا گذارا کرتے ہیں ۔

(جاری ہے)

انہوں نے اعلان کیاکہ ہم سی جے کینال کی بندش کے خلاف ایوان کی کاروائی سے بائیکاٹ کرتے ہیں اپوزیشن کے بائیکاٹ پر سپیکر نے انہیں منانے کیلئے صوبائی وزراء ندیم کامران ،اشرف سوہنارکن اسمبلی اللہ رکھاپر مشتمل کمیٹی تشکیل دی تاہم اپوزیشن نے ایوان میں واپس آنے سے انکار کردیا۔ اس موقع پر سینئر وزیر راجہ ریاض نے اپوزیشن کو تنقید کا نشانہ بناتے ہوئے کہاکہ پنجاب کبھی اپنے موقف سے پیچھے نہیں ہٹا اور ارسا کے اجلاس میں سی جے کینال کو کھولنے کا باقاعدہ فیصلہ ہوچکاہے انہوں نے ارسا کی جانب سے جاری آرڈر کو پڑھنے کے بعد اسکی کاپی سپیکر کو بھی بجھوائی سینئر وزیر راجہ ریاض کا کہناتھا کہ کل تک یہی لوگ آمر کی جوتیاں اٹھاتے اور پالش کرتے تھے انہیں اس وقت پنجاب کے حقوق کا خیال نہیں آیا آج تمام صوبوں کے وزرائے اعلیٰ اکٹھے بیٹھ کر ایک دوسرے کو بھائی کہہ رہے ہیں این ایف سی ایوارڈ کا اعلان ہوا انہوں نے کہاکہ اگر دس سے پندرہ ہزار کیوسک پانی سندھ کو چلاجاتا ہے تو کیاہوا کیاسندھ انڈیا ہے اپوزیشن نے کس بات کی کالی پٹیاں باندھی ہوئی ہے انہوں نے کہاکہ پانی کیاہم سندھ کے بھائیوں کو ضرورت پڑنے پر خون بھی دیں گے انہوں نے کہاکہ بینظیر بھٹو چاروں صوبوں کی زنجیر تھی ہم نے صوبوں کو مبضوط بنانا ہے لیکن صوبوں کو لڑانے والے بدنصیب لوگ اپنے دور میں آمر کو سپورٹ کرتے رہے اور اسے دس دس بار وردی میں منتخب کرنے کی باتیں کرتے رہے انہوں نے کہاکہ کالی پٹیاں اپوزیشن کی بازو پر نہیں بلکہ ان کی آنکھوں پر بندھی ہوئی ہیں یہ دیکھیں کہ سی جے کینال کھل چکی ہے ۔

متعلقہ عنوان :