پی آئی سی میں مریضوں کو دی جا نیوالی ادویات کے ری ایکشن سے ہلاکتوں کی تعداد 27ہوگئی ،گورنر اور وزیر اعلیٰ کی طرف سے بنائی گئی کمیٹیوں کی طرف سے تحقیقات کا سلسلہ جاری ،تاحال ذمہ داروں کا تعین نہ ہو سکا

پنجاب انسٹی ٹیوٹ آف کارڈیالوجی میں مریضوں کو دی جا نیوالی ادویات کے ری ایکشن سے ہلاکتوں کی تعداد 27تک پہنچ گئی ہے ، گورنر پنجاب سردار لطیف کھوسہ اور وزیر اعلیٰ شہباز شریف کی طرف سے بنائی گئی کمیٹیوں کی طرف سے تحقیقات کا سلسلہ جاری ہے لیکن تاحال ذمہ داروں کا تعین نہیں کیا جا سکا ،پنجاب حکومت کی قائم کردہ تحقیقاتی کمیٹی کے سربراہ ڈاکٹر جاوید اکرم نے کہا ہے کہ تما م عوامل کا جائزہ لے رہے ہیں تاہم تخریب کاری بھی خارج از امکان نہیں کیونکہ دوائی میں جس عنصر کی ابتدائی طور پر نشاندہی ہوئی ہے وہ عام طور پر ادویات ساز فیکٹری میں نہیں ہوتا،خریدی گئی ادویات کے ایک بیج میں مسئلہ سامنے آیا ہے اور24ہزار مریض یہ ادویات لے چکے ہیں جن میں سے 30فیصدنے یہ واپس کر دی ہیں،105مریض زیر علاج ہیں جن میں سے 50کی حالت تشویشناک ہے جسکی وجہ سے ہلاکتوں میں اضافے کے خدشہ ہے ،چیئرمین فارماسوٹیکل ایسوسی ایشن ڈاکٹر ریاض احمد نے کہا ہے کہ فارما سوٹیکل کمپنیوں کو بدنام کرنے کی کوشش کی جا رہی ہے ،ادویات جعلی ہیں اور نہ ہی ان میں مرکری کی آمیزش ہے بلکہ شرح اموات میں کسی وائرل انفیکشن اور بائیو وار کا نتیجہ ہو سکتی ہیں۔

(جاری ہے)

بتایا گیا ہے کہ پی آئی سی سے ملنے والی ادویات کے استعمال کے بعد ہسپتالوں میں لائے جانیوالے مریضوں میں سے مزید چار افراد ہلاک ہو گئے ہیں جسکے بعد یہ تعداد 27 ہو گئی ہے جبکہ کئی زیر علاج مریضوں کی حالت تشویشناک ہے