ملالہ یوسفزئی کے دماغ کو زیادہ نقصان نہیں پہنچا، سی ٹی سکین رپورٹ، ملالہ یوسفزئی کی صحت اطمینان بخش ہے،آئندہ 36 سے48 گھنٹے اہم ہیں،قوم اس کیلئے دعا کرے ،ڈی جی آئی ایس پی آر میجر جنرل عاصم سلیم باجوہ کی میڈیا سے گفتگو

عزم و ہمت کی علامت ملالہ یوسفزئی کی سی ٹی سکین رپورٹ کے مطابق ملالہ کے سر کی ہڈی کو نقصان پہنچا ہے تاہم دماغ کو زیادہ نقصان نہیں پہنچا۔امن کی سفیر ملالہ یوسف زئی نے محض چودہ سال کی عمر میں شدت پسندی کا جواں مردی سے مقابلہ کیا اور اب وہ زندگی بچانے کے لیے موت کے ساتھ بھی جنگ لڑ رہی ہے۔ راولپنڈی کے آرمڈ فورسز انسٹی ٹیوٹ آف کارڈیالوجی میں اس کی طبعیت میں قدرے بہتری کے آثار پائے جاتے ہیں۔

ذرائع کے مطابق گزشتہ روز ملالہ یوسفزئی کا سی ٹی سکین کیا گیا۔ رپورٹ میں بتایا گیا کہ ملالہ کے سر کی ہڈی کو نقصان پہنچا ہے تاہم دماغ کو زیادہ نقصان نہیں ہوا۔ ملالہ یوسفزئی تاحال وینٹی لیٹر مشین پر ہے۔ اس کے چہرے اور سر پر سوجن موجود ہے۔ ڈاکٹر اسے ری لیکسینٹ اور اینٹی بائیٹکس ادویات دے رہے ہیں۔

(جاری ہے)

پاک فوج کے سرجن جنرل معاملے کی خود نگرانی کررہے ہیں۔

سٹاف کے علاوہ کسی کو بھی آئی سی ٹی وارڈ میں جانے کی اجازت نہیں۔ ہسپتال میں سیکیورٹی بھی ہائی الرٹ ہے۔ ادھرڈی جی آئی ایس پی آر میجر جنرل عاصم سلیم باجوہ نے کہا ہے کہ ملالہ یوسفزئی کی صحت اطمینان بخش ہے۔ تاہم اس سلسلے میں آئندہ 36 سے48 گھنٹے اہم ہیں۔ جمعے کا مبارک دن ہے قوم ملالہ کیلئے دعا کرے۔راولپنڈی میں پاک فوج کے شعبہ تعلقات عامہ کے دفتر میں میڈیا سے گفتگوکرتے ہوئے ڈی جی آئی ایس پی آر میجر جنرل عاصم سلیم باجوہ نے کہا کہ ملالہ کو آئی سی یو میں شفٹ کردیا گیا ہے اور ماہر ڈاکٹرز کے مطابق ملالہ کی صحت اطمینان بخش ہے