حکومت عوام کو درپیش صحت ، تعلیم ، غربت سمیت دیگر مسائل کے حل کیلئے تنہا ء نبر دآزما نہیں ہو سکتی ،ہمہ گیر سماجی ترقی اور عوام کا معیار زندگی بلند کرنے کیلئے حکومت اور این جی اوز کو مربوط حکمت عملی پر عمل پیر ا ہونا وقت کی اہم ضرورت ہے۔ وفاقی وزیر نیشنل ریگولیشنز اینڈ سروسز ڈاکٹر فردوس عاشق اعوان کی وفدسے گفتگو

اسلام آباد (اُردوپوائنٹ تازہ ترین۔ آئی این پی، 11 نومبر 2012) وفاقی وزیر نیشنل ریگولیشنز اینڈ سروسز ڈاکٹر فردوس عاشق اعوان نے کہا ہے کہ بدلتے ہوئے عالمی حالات میں ہمہ گیر سماجی ترقی اور عوام کا معیار زندگی بلند کرنے کیلئے حکومت اور این جی اوز کو مربوط حکمت عملی پر عمل پیر ا ہونا وقت کی اہم ضرورت ہے ۔ وہ جمعہ کویہاں اپنے دفتر میں پاکستان کے دورے پر آئے ہوئے جنوبی کوریا کی بین الاقوامی این جی او اوباس اور پاکستان کونسل فار سوشل ویلفیئر اینڈ ہیومن رائٹس کے مشترکہ وفد سے بات چیتکر رہی تھیں ۔

وفد کی قیادت اوباس کوریا کے شعبہ بین الاقوامی ترقی و تعاون کے سربراہ پارک جے چول ، پاکستان کونسل فارسوشل ویلفیئر اینڈ ہیومن رائٹس کے چیئر مین محمد اعجاز نوری نے کی ، اس موقع پر پاکستان کونسل کے ڈائریکٹررمضان مصطفائی بھی موجود تھے۔

(جاری ہے)

وفاقی وزیر نے کہا کہ حکومت عوام کو درپیش صحت ، تعلیم ، غربت سمیت دیگر مسائل کے حل کیلئے تنہا نبر دآزما نہیں ہو سکتی اس کے لئے پبلک سیکٹر اور این جی اوز کو آگے آنا ہو گا ۔

انہوں نے کہا کہ دنیا سے غربت ، افلاس ، بد امنی، جنگ وجدل کے خاتمہ اور دہشت گردی ، انتہا پسندی ، منفی سوچ سے لڑنے کیلئے بین المذاہب تعلقات کا فروغ موجودہ حالات کا تقاضا ہے ، پاکستان کی حکومت بین المذاہب تعلقات، مذہبی رواداری کے فروغ کے لئے ممکنہ وسائل بروئے کا رلا رہی ہے ، تاکہ ملک سے بد امنی ، انتہا پسندی اور دہشت گردی کا خاتمہ ممکن بنایا جا سکے اُنہوں نے کہا کہ حقیقی جمہوریت کے فروغ اور تسلسل میں ہی پاکستان کی بقاء مضمر ہے لہذا تمام اداروں اور سیاستدانوں کا یہ فرض بنتا ہے کہ وہ پاکستان کی بقاء کے لیے حقیقی جمہور یت کے فروغ اور تسلسل کے لیے اپنا اپنا کردار ادا کریں تا کہ ہم پاکستان کو ایک فلاحی اسلامی ریاست بنا سکیں انہوں نے مذید کہا کہ کوریا اور پاکستان نہ صرف اچھے دوست ہیں بلکہ ہمارے درمیان محبت ، اخوت و ہم آہنگی کا مضبوط رشتہ پروان چڑھ رہا ہے۔

انہوں نے پاکستان خصوصاً آزاد کشمیر میں پاکستان کونسل فار سوشل ویلفیئر اینڈ ہیومن رائٹس اور اوباس کوریا کے منصوبوں کی تعریف کرتے ہوئے اپنے بھر پور رتعاون کا یقین دلایا ، اس موقع پر وفد کی جانب سے وفاقی وزیر فردوس اعوان کو خصوصی یاد گاری شیلڈ بھی پیش کی گئی ۔