پشاور میں رضاکار پر فائرنگ کے بعد عالمی ادارہ صحت کی خیبر پختونخوامیں انسداد پولیو مہم ختم کرنے کی تجویز، حکومت کا مہم جاری رکھنے کا فیصلہ

منگل 18 دسمبر 2012 20:56

پشاور(اُردو پوائنٹ اخبار تازہ ترین۔آئی این پی۔18دسمبر۔ 2012ء) پشاور میں انسداد پولیو مہم میں حصہ لینے والی ایک رضاکارکو گولی مارنے کے واقعے کے بعد عالمی ادارہ صحت نے پشاور سمیت خیبر پختون خوامیں انسداد پولیو مہم ختم کرنے کی تجویز دی ہے تاہم محکمہ صحت حکام نے مہم جاری رکھنے کا فیصلہ کیا ہے۔فائرنگ کا واقعہ تھانہ متھرا کی حدود میں پیش آیا۔

(جاری ہے)

پولیس کے مطابق انسداد پولیو مہم میں حصہ لینے والی رضاکار چودہ سالہ فرزانہ بچوں کو پولیو کے قطرے پلانے کے لئے جا رہی تھی کہ نامعلوم موٹر سائیکل سوار نیا س پر فائرنگ کر دی۔ ایک گولی لڑکی کے سر میں لگی جس سے وہ شدید زخمی ہو گئی۔ اور اسے لیڈی ریڈنگ اسپتال منتقل کر دیا گیا ہے جہاں ڈاکٹروں کے مطابق اس کی حالت تشویش ناک ہے۔پولیس نے واقعے کی ایف آئی آر درج کر لی ہے۔واقعے کے بعد عالمی ادارہ صحت نے پشاور سمیت صوبے بھر میں پولیو مہم ختم کرنے کی تجویز صوبائی حکومت کو دی۔ تاہم محکمہ صحت کے مطابق انسداد پولیو مہم جاری رکھی جائے گی۔