سُنی تحریک نے پولیو مہم رضا کاروں کے تحفظ کیلئے کارکنان دینے کی پیشکش کردی، پولیومہم شریعت کے متصادم نہیں،ملک کے جیدمفتیان کرام سے مزید فتوے جاری کروائیں گے،علماء ومشائخ پولیومہم کے حق میں عوامی رائے عامہ ہموارکریں اورقوم کی علمی وفکری رہنمائی کریں،لیڈیزہیلتھ ورکرزکو قتل کرنیوالے فسادفی الارض کے مرتکب اوراسلام اورپاکستان کی بدنامی کاباعث ہیں، پاکستان سنی تحریک کے صوبائی صدرشاداب رضانقشبندی کی علما کے وفدسے گفتگو

راولپنڈی/ اسلام آباد( اُردو پوائنٹ اخبار تازہ ترین۔ آئی این پی۔22دسمبر 2012ء ) پاکستان سنی تحریک کے صوبائی صدرشاداب رضانقشبندی نے کہا ہے کہ پولیو مہم کے رضا کاروں کو تحفظ فراہم کرنے کیلئے سنی تحریک ملک بھر سے اپنے کارکنان دینے کوتیارہے۔ پو لیو مہم کے حق میں ملک بھرکے جیدمفتیان کرام سے مزیدفتوے جاری کروائیں گے۔پولیومہم شریعت کے ہرگزمتصادم نہیں،اسکی مخالفت کرنیوالے جاہل، اسلام اور پا کستان کے دشمن ہیں۔

لیڈیزہیلتھ ورکرزکو قتل کرنیوالے فسادفی الارض کے مرتکب ہورہے ہیں اوراسلام اورپاکستان دونوں کی بدنامی کاباعث بن رہے ہیں۔ پولیومہم شرعی نقطہ نظرسے بالکل درست ہے،کیونکہ پولیوکے قطرے پلانے سے بچوں کو مستقبل میں معذوری سے بچایاجاسکتاہے اورموذی امراض کاتدارک کیاجاسکتاہے۔

(جاری ہے)

دنیابھرکے طبّی ماہرین پولیوکے علاج کومفیدقراردے چکے ہیں۔

علماء ومشائخ پولیومہم کے حق میں عوامی رائے عامہ ہموارکریں اورقوم کی علمی وفکری رہنمائی کریں۔ان خیالات کااظہارانہوں نے مرکزاہلسنت پر علماء ومشائخ اہلسنت کے وفدسے گفتگوکرتے ہوئے کیا۔ انہوں نے کہا کہ پولیو ورکرز کا بہیمانہ قتل انتہائی قابل مذمت ہے اگر حکومت نے ان واقعات پرقابو نہ پایا تو حالات انتہائی گھمبیر صورتحال اختیار کر سکتے ہیں۔

انہوں نے مطالبہ کیا کہ خواتین رضا کاروں پر حملہ کرنے والے مجرموں کو گرفتار کیا جائے ، پس پشت ہاتھوں کو بے نقاب کیاجائے اور انہیں عبرتناک سزا دی جائے ۔ آئندہ اس سلسلے میں مہم کی جو تاریخ مقرر کی جائیں گی اُس میں پاکستان سنی تحریک کے فلاحی شعبہ اہلسنت خدمت فاؤنڈیشن(ٹرسٹ) کے رضاکاربھی بھرپور طریقے سے حصہ لیں گے ۔شاداب رضانقشبندی نے باقی تمام سماجی تنظیموں سے اپیل کی کہ وہ اس سلسلے میں اپنا بھرپور کردارادا کریں تاکہ پاکستان سے پولیو کے مرض کا جلد از جلد خاتمہ ہو ۔