بلاول بھٹو زرداری شہید زوالفقار علی بھٹو اور شہید بے نظیر بھٹو کے مشن کے وارث ہیں، ان کی مقبولیت سے جمہوریت دشمن قوتوں کی نیندیں حرام ہو گئی ہیں، پاکستان میں مصر کے طرز کا سیاسی ماڈل تسلیم کیا اور نہ ہی اسے چلنے دیا جائے گا، ہم جمہوریت کے ذریعے ہی انتقام لیتے ہیں اور ملک میں جمہوری نظام چلتا رہے گا، غیرجانبدار نگراں سیٹ اپ بنانے کے لئے تمام سیاسی جماعتوں سے صلاح و مشورے کئے جارہے ، ڈپٹی سپیکرقومی اسمبلی فیصل کریم خان کنڈی کا گڑھی خدابخش سے ڈیرہ اسما عیل خان میں کارکنوں کے اجتماع سے ٹیلی فونک خطاب

اتوار 30 دسمبر 2012 21:14

ڈیرہ اسماعیل خان(اُردو پوائنٹ اخبار تازہ ترین۔آئی این پی۔30دسمبر۔ 2012ء) قومی اسمبلی کے ڈپٹی سپیکر فیصل کریم خان کنڈی نے کہا کہ بلاول بھٹو زرداری شہید زوالفقار علی بھٹو اور شہید بے نظیر بھٹو کے مشن کے وارث ہیں اور ان کی مقبولیت سے جمہوریت دشمن قوتوں کی نیندیں حرام ہو گئی ہیں کیو نکہ جو لوگ بے نظیر بھٹو کی شہادت کے بعد ملک میں جمہوری نظام کی تباہی کے خواب دیکھ رہے تھے صدر آصف علی زرداری نے اپنے دور صدارت اور اب بلاول بھٹوزرداری کی سیاسی فعالیت کی صورت میں ان قوتوں کے عزائم نہ صرف خاک میں ملا دیئے بلکہ یہ ثابت کردیا کہ بھٹو خاندان اور پی پی پی کا ہر ورکر ملک میں جمہوریت کے قیام اور ملک کی ترقی کے لیئے ہر وقت میدان عمل میں موجود رہے گا۔

وہ گڑھی خدابخش سے ڈیرہ اسما عیل خان میں پارٹی کارکنوں کے ایک اجتماع سے ٹیلی فونک خطاب کر رہے تھے، انہوں نے کہا کہ پیپلز پارٹی نے مشرف دور کے غیر آئینی اقدامات سے ملک کو پاک کیاہم نے اپنے منشور کے مطابق1973ء کے آئین کو بحال کیا ، پاکستان میں آزاد الیکشن کمیشن کا قیام پیپلز پارٹی کا بڑا کارنامہ ہے۔

(جاری ہے)

انہوں نے کہا کہ پی پی پی کی حکومت نے پانچ سے کم عرصے میں جمہوری اقدار کا فروغ یقینی بنایااور ملک میں اقلیوں کے حقوق کے لیے قانون سازی کی جا رہی ہے۔

اسی طرح بینظیر انکم سپورٹ پروگرام کے زریعے غریب افراد کو نہ صرف امداد ان کی دہلیز پر دی جا رہی ہے بلکہ مستحق افراد کو روزگار کے قابل بنانے کے لیئے بھی اسی پروگرام سے امدادی رقوم کی فراہمی اور انہیں تربیت سازی کا عمل جاری ہے ، انہوں نے کہا کہ بلوچستان میں ماضی کی آمرانہ حکومتی پالیسیوں کی وجہ سے لگنے والی آگ سے ہم غافل نہیں ہیں اور بلوچستان ہمارے جسم کا حصہ ہے۔

ہم نے بلوچستان کو حقوق دئیے۔انہوں نے کہا کہ جو شمع برسوں پہلے ذوالفقار علی بھٹو نے روشن کی تھی اور جس کو روشن رکھنے کے لئے بے نظیر بھٹو نے اپنی جان اور صدر آصف علی زرداری نے جگر کا خون دیا اسی شمع کو زوالفقار علی بھٹو شہید کے نواسے آگے بڑھا رہے ہیں۔فیصل کریم خان کنڈی نے کہا کہ پاکستان میں مصر کے طرز کا سیاسی ماڈل نہ تسلیم کیا جائے گا اور نہ ہی اسے چلنے دیا جائے گا ہم جمہوریت کے ذریعے ہی انتقام لیتے ہیں اور ملک میں جمہوری نظام چلتا رہے گااگر کسی کو سیاست میں حصہ لینا ہے تو وہ انتخاب لڑے اور جیت کر حکومت میں آئے انہوں نے کہا کہ منصفانہ انتخابات کرانے کے تمام انتظامات کئے گئے ہیں، آزاد الیکشن کمیشن قائم کیا گیا ہے اور غیرجانبدار نگراں سیٹ اپ بنانے کے لئے تمام سیاسی جماعتوں سے صلاح و مشورے کئے جارہے ہیں۔

انہوں نے کہا کہ ڈیرہ اسما عیل خان پی پی پی کا گڑھ ہے اور مستقبل میں یہاں سے پی پی پی کے امیدوار ہی بھاری اکثریت سے کامیاب ہوں گے۔