گڑھی خدا بخش میں بلاول بھٹو کی تقریر عوام کی آواز تھی‘سپریم کورٹ پنجاب میں کھانسی کا شربت پینے سے ہونے والی ہلاکتوں پر بھی نوٹس لے اور ملوث افراد کے خلاف کاروائی کی جائے ، آزادجموں وکشمیر کے وزیرا طلاعات سید بازل علی نقوی کا بے نظیر کی جائے شہادت پر کارکنوں سے خطاب

اسلام آباد (اُردو پوائنٹ اخبار تازہ ترین۔ آئی این پی۔31دسمبر 2012ء) آزادجموں وکشمیر کے وزیرا طلاعات سید بازل علی نقوی نے کہا ہے کہ بلاول بھٹو زردای ملک کے آئندہ وزیر اعظم ہونگے ،گڑھی خدا بخش میں ان کا پیغام عوام کے دلوں کی آواز تھا ۔آئندہ انتخابات میں پیپلز پارٹی صدر آصف علی زرداری کی قیادت میں بھرپور کامیابی حاصل کرے گی اور پنجاب میں بھی وزیرا علی پیپلز پارٹی کا ہو گا ۔

وزیرا طلاعات نے ان خیالات کا اظہار لیاقت باغ میں محترمہ بے نظیر بھٹو کی جائے شہادت پر حاضری کے بعد کارکنوں سے خطاب میں کہی ۔سید بازل علی نقوی نے کہا کہ بھٹو کا مشن روکنے والے مٹ گئے مگر نہ تو بھٹو کی سوچ روکی جا سکی اور نہ ہی بھٹو نظریے کو ختم کیا جا سکا ۔انہوں نے کہا کہ اس مرتبہ پیپلز پارٹی پنجاب میں بھی اپنا وزیر اعلی لائے گی اور اس صوبے سے کرپٹ حکمرانوں کا خاتمہ ہو گا ۔

(جاری ہے)

انہوں نے کہا کہ سپریم کورٹ کو چاہیے کہ وہ پنجاب میں کھانسی کو شربت پینے سے ہلاکتوں پر نوٹس لے اور ملوث افراد کو کیفر کردار تک پہنچائے ۔انہوں نے کہا کہ وزیرا علی پنجاب شہزادوں کی طرح حکومت کرنا چاہتے ہیں مگر اب انہیں غریب عوام پر مسلط نہیں ہونے دیا جائے گا ۔سید بازل علی نقوی نے کہا کہ لیڈر ہو تو بھٹو جیسا ،اور محترمہ بے نظیر بھٹو جیسا جنہوں نے تمام مصائب کو خندہ پیشانی سے برداشت کیا مگر اپنے اصولوں کو نہیں چھوڑا ۔اس موقع پر محترمہ بے نظیر بھٹو کے درجات کی بلندی کے لئے خصوصی دعا کی گئی ۔