انگریز نے ملک میں طبقاتی نظام وراثت میں چھوڑا ہے، الیکشن میں غریب کو غلامی سے نکلنے کا فیصلہ کرنا ہو گا، ملک کو فلاحی ریاست بنانے کے لئے مزدور کو اس کا حق دینا ہو گا، ہمارے دور میں کوئی جاگیردار اپنے مزارعے کو بے دخل نہیں کر سکے گا، جمعیت علمائے اسلام کے قائد مولانا فضل الرحمان کا ڈیرہ میں انتخابی جلسہ سے خطاب

ڈیرہ اسما عیل خان(اُردو پوائنٹ اخبار تازہ ترین۔آئی این پی۔18اپریل۔ 2013ء) جمعیت علمائے اسلام کے قائد مولانا فضل الرحمان نے کہا ہے کہ انگریز نے اس ملک میں طبقاتی نظام وراثت میں چھوڑا ہے۔الیکشن میں غریب کو غلامی سے نکلنے کا فیصلہ کرنا ہو گا۔ ملک کو فلاحی ریاست بنانے کے لئے مزدور کو اس کا حق دینا ہو گا۔ ہمارے دور میں کوئی جاگیردار اپنے مزارعے کو بے دخل نہیں کر سکے گا۔

وہ جامع مسجد کلاں میں ایک انتخابی جلسہ سے خطاب کر رہے تھے ۔ انہوں نے کہا کہ ہر شخص احترام کا حقدار ہے۔ احترام کے بغیر انسان کو اشرف المخلوقات نہیں کہا جا سکتا۔

(جاری ہے)

ہم عوام کو اس ذلت اور جبر سے نکال دینا چاہتے ہیں جو علاقائی وڈیروں اور جاگیر داروں نے عوام پر مسلط کیا ہوا ہے، ہمارا یہ مشن ہے کہ اس علاقے میں صنعتیں قائم ہوں، یہاں زراعت ترقی کرے اور معاشی خوشحالی آئے تاکہ غریب ڈیرہ وال کسی خان وڈیرے کی خوہشات کے بجائے اپنی مرضی کے فیصلے کر سکیں انہوں نے کہا کہ ہمارے مخالفین کی سیاست اور ہماری سیاست میں فرق یہ ہے کہ وہ کوئی بھی کام کرنے کو عوام پر اپنا احسان جتلاتے ہیں جبکہ ہم عوامی کدمت کے کام اسی لیئے کرتے ہیں کہ یہ شریعت خداوندی کا حکم ہے کیو نکہ ہماری سیاست شرعی احکامات کے تابع ہے ، انہوں نے کہا کہ ملک بھر اور بالخصوص ڈیرہ اسما عیل خان میں جماعتی کارکنوں کی قربانیوں، محنت اور خون کے نذرانے دینے کے ثمرات آج اس خطے میں جے یو آئی کی مقبولیت کی صورت میں سامنے آرہے ہیں اور جماعت اقتدار میں آنے کے بعد اسلام دشمن قوتوں کا جہاں جہاں راستہ روکے گی اور شرعی احکامات کو جہاں بھی لاگو کرے گی اس کا اجر و ثواب جے یو آئی کے کارکنوں اور ہمارے ووٹرز کو بھی ملے گا، انہوں نے کہا کہ ماضی کے حکمرانوں کے بلا جواز حمایت امریکہ نے ملک کو بد امنی میں مبتلا کر دیا ہے، ہم نے اس ملک کو بد امنی سے نہ صرف نکالنا ہے بلکہ یہاں دوبارہ امن اور خوشحالی کے قیام کو یقینی بھی بنانا ہے