محتسب پنجاب نے پولیو کی ادویات کے لئے فریج اور ویکسین باکس فروخت کرنے کا نوٹس لے لیا،ایڈوائزر رانا امان اللہ خان انکوائری افسر مقرر‘سیکرٹری صحت کو ایک ہفتے میں رپورٹ پیش کرنے کی ہدایت،محتسب کے سوموٹو کے نتیجے میں لودھراں کی ایک بستی میں 240بچوں کا مفت علاج اور 123کو حفاظتی ٹیکے لگائے گئے

لاہور(اُردو پوائنٹ اخبار تازہ ترین۔آئی این پی۔25اپریل۔ 2013ء) محتسب پنجاب جاوید محمود نے شیخوپورہ میں پولیو سے بچاؤ کی ادویات کے لئے خریدے گئے فریج اور ویکسین باکس فروخت کرنے کا نوٹس لے لیا ہے اور سیکرٹری ہیلتھ پنجاب اور ڈائریکٹر جنرل ہیلتھ سروسز کو ایک ہفتے میں رپورٹ پیش کرنے کی ہدایت کی ہے ۔ محتسب پنجاب نے سیکرٹری صحت پنجاب اور ڈائریکٹر جنرل ہیلتھ سروسز کو ہدایت کی ہے کہ وہ اپنی رپورٹ میں واضح کریں کہ محکمہ صحت نے سرکاری مشینری اور طبی عملے کے زیراستعمال آلات اور دیگر اشیاء کی فہرست مرتب کرنے کا کیا طریقہ کار وضع کر رکھا ہے اور محکمہ صحت کی سرکاری مشینری اور آلات کی مسلسل نگرانی کس طریقے سے کی جا رہی ہے؟ محتسب پنجاب نے یہ ہدایت میڈیا میں آنے والی رپورٹ پر جاری کی ہے جس میں کہا گیا کہ تحصیل فیروزوالہ ضلع شیخوپورہ میں محکمہ صحت کے عملے نے پولیو سے بچاؤ کے قطرے اور دیگر ادویات محفوظ رکھنے کے لئے خریدی جانے والی فریج اور متعدد ویکسین باکس مقامی دکاندار کو فروخت کر دیئے ہیں۔

(جاری ہے)

محتسب پنجاب نے ایڈوائزر محتسب آفس رانا امان اللہ خان کو معاملے کی انکوائری کی ہدایت کی ہے۔ اسی طرح محتسب پنجاب کی طرف سے ضلع لودھراں میں دریائے ستلج کے کنارے آباد بستی موڑ فقیراں میں گیسٹرو اور پراسرار بیماری کی وجہ سے سات بچوں کی ہلاکت سے متعلق اخباری تراشے پرسوموٹو کے نتیجے میں محکمہ صحت نے نہ صرف مقامی بستی میں میڈیکل کیمپ قائم کر کے ڈاکٹرز اور پیرامیڈیکل سٹاف تعینات کیا بلکہ آبادی کے 240بچوں کا مفت طبی علاج کیا گیا اور 123 بچوں کو حفاظتی ٹیکے لگائے گئے۔

محتسب پنجاب نے محکمہ صحت کے ذمہ داران کو حکم دیا ہے کہ وہ سیلاب سے متاثرہ علاقوں میں قائم ہونے والی چھوٹی چھوٹی بستیوں میں وبائی امراض کے ممکنہ پھیلاؤ اور حفاظتی ٹیکوں کے کورس یقینی بنانے کے لئے مربوط لائحہ عمل مرتب کریں اور اپنے آپ کو ہروقت تیار رکھیں تاکہ قیمتی انسانی جانوں کے ضیاع سے بچا جا سکے۔