حکومتی اداروں کی مربوط کوششوں سے ڈینگی کی صورتحال مکمل کنٹرول میں ہے ،ڈینگی کے خاتمہ کیلئے تعمیراتی سائٹس ،قبرستانوں ، کباڑ خانوں ، ٹائر شاپس، سرکاری عمارات کی چھتوں کی سرویلنس جاری رکھی جائے ،ڈینگی کا موجودہ سیزن چند دنوں میں ختم ہو رہا ہے، بارشوں کے موسم میں ڈینگی پھر سر اٹھا سکتا ہے ، سرکاری محکموں اور عوام کو مستعد رہنا ہو گا ، سیکرٹری صحت پنجاب عارف ندیم کا ڈینگی رسپانس کمیٹی کے اجلاس سے خطاب

جمعہ 3 مئی 2013 21:50

لاہور(اُردو پوائنٹ اخبار تازہ ترین۔آئی این پی۔3مئی۔2013ء) سیکرٹری صحت پنجاب عارف ندیم نے کہا ہے کہ سرکاری محکموں کی مربوط کوششوں ، ویکٹر سرویلنس ، لاروی سائڈنگ اور عوام کے بھر پور تعاون سے ڈینگی کی صورتحال مکمل کنٹرول میں ہے ، ڈینگی پر کنٹرول برقرار رکھنے کے لئے تعمیراتی جگہوں، قبرستانوں ، کباڑ خانوں ، ٹائر شاپس ، سرکاری عمارتوں کی چھتوں اور دیگر بریڈنگ سائٹس کی مانیٹرنگ پر خصوصی توجہ دینا ہو گی ۔

وہ جمعہ کو سول سیکرٹریٹ میں ڈینگی رسپانس کمیٹی کے اجلاس کی صدارت کررہے تھے ۔

(جاری ہے)

اجلاس میں کی ای ایم یوکے وائس چانسلر پروفیسر ڈاکٹر فیصل مسعود کے علاوہ محکمہ صحت، محکمہ اطلاعات ، ہائر ایجوکیشن ، سکول ایجوکیشن ،محکمہ ماحولیات ، لوکل گورنمنٹ ، کوآپریٹو ، لیبر ڈیپارٹمنٹ ، محکمہ زراعت ، خزانہ ، محکمہ جنگلات و ماہی پروری پنجاب انفارمیشن ٹیکنالوجی بورڈ کے سیکرٹریز ، ایڈیشنل سیکرٹریز ، سینئر افسران او رکمشنر لاہور ڈویژن نے بھی شرکت کی - اجلاس میں مختلف محکموں کے افسران نے اپنے محکموں کی طرف سے ڈینگی کی روک تھام کے لئے جاری اقدامات بارے بریفنگ دی - اس موقع پر ایڈیشنل ڈائریکٹر جنرل ہیلتھ ویکٹر بارن ڈیزیز ڈاکٹر جعفر الیاس نے بتایا کہ اس وقت ڈینگی کے مریض رپورٹ نہیں ہو رہے اور مشتبہ مریضوں کی تعداد بھی بہت کم ہو گئی ہے اور ویکٹر سرویلسنس کے دوران کھلی جگہوں پر ڈینگی لاروا ملنے کے امکانات بہت کم ہیں تاہم درجہ حرارت میں اضافہ سے ڈینگی مچھر گھروں کے اندر ٹھنڈی جگہ موجود ہو سکتا ہے - چیف اینٹامالوجسٹ ڈاکٹر وسیم اکرم نے کہا کہ ڈینگی کا موجودہ سیزن آئندہ چند دنوں تک ختم ہو جائے گا او ر فی الحال ڈینگی بخار کے امکانات ختم ہو گئے ہیں تاہم موسم برسات کے ساتھ ہی ڈینگی مچھر کی افزائش بڑھ جائے گی اور ڈینگی کا مرض پھر سے سر اٹھا سکتا ہے - سیکرٹری صحت نے ہدایت کی کہ تمام متعلقہ محکمے پوری طرح ویجلنٹ رہیں اور ڈینگی کنٹرول کے موجودہ SOPs پر عملدرآمد جاری رکھا جائے - انہوں نے لوگوں سے بھی اپیل کی کہ وہ اپنے گھروں کے اندر ، چھتوں پر صفائی کا خیال رکھیں اور فالتو پانی جمع نہ ہونے دیں تاکہ ڈینگی مچھروں کی افزائش کو روکا جا سکے - سیکرٹری صحت نے ڈینگی کے بارے آگاہی مہم جاری رکھنے کی بھی ہدایت کی -

متعلقہ عنوان :