Live Updates

وزیراعلیٰ پنجاب پبلک ٹرانسپورٹ کے ساتھ ساتھ تعلیم اور صحت پر بھی خصوصی توجہ دیں،امریکی خفیہ ایجنسی کا پاکستان سے ساڑھے 13ارب معلومات کا چرانا تشویشناک ہے،بلوچستان میں مسخ شدہ لاشوں کا ملنا قابل مذمت ،ملک کو درپیش خطرات سے نمٹنے کے لئے مل کر کام کرنا ہوگا، امیر جماعت اسلامی پنجاب و نومنتخب رکن پنجاب اسمبلی ڈاکٹر وسیم اختر کا بیان

پیر 10 جون 2013 17:03

لاہور(اُردو پوائنٹ تازہ ترین اخبار۔آئی این پی۔ 10جون 2013ء) امیر جماعت اسلامی پنجاب و نومنتخب ممبر صوبائی اسمبلی اور پارلیمانی لیڈر ڈاکٹر سید وسیم اختر نے کہا ہے کہ وزیراعلیٰ پنجاب پبلک ٹرانسپورٹ کے ساتھ ساتھ غریب اور متوسط طبقہ کے لئے تعلیم اور صحت کو عام کرنے کی طرف خصوصی توجہ دیں،پرائیویٹ تعلیمی ادارے بھاری فیس وصول کرکے تعلیم کو تجارت بنانے میں مصروف ہیں۔

حکومت پنجاب سرکاری سطح پر معیار تعلیم کی سہولتیں عوام کو فراہم کرے،سرکاری سطح پر نئے سکولز اور کالجز کھولے جائیں تاکہ غریب اور متوسط طبقے کے افراد تعلیم حاصل کرسکیں۔پیر کو اپنے ایک بیان میں انہوں نے کہاکہ سود کی رقم کو فیول ایڈجسٹمنٹ کی مد میں وصول کرنا غیر شرعی اقدام ہے۔آئی پی پیز نے اپنے تھرمل بجلی گھروں کی صلاحیت کاصرف40فیصد استعمال کیا ہے۔

(جاری ہے)

لوڈشیڈنگ کے خاتمے کے لئے550ارب روپے کی رقم درکار ہے جو لائن لاسز کو کنٹرول اور نادہندگان سے وصول کرکے پوری کی جاسکتی ہے۔وزیر اعظم نواز شریف تمام خفیہ اور صوابدیدی فنڈختم کرکے کرپشن کو کنٹرول کریں۔انہوں نے کہاکہ امریکی خفیہ ایجنسی کی جانب سے دنیا بھر کے ممالک سے97اور بالخصوص پاکستان سے ساڑھے 13ارب خفیہ معلومات چرانا تشویشناک ہے۔

انٹیلی جنس معلومات کا ریکارڈ نہ رکھنے کے امریکی دعوے کا پول کھل چکا ہے۔نیشنل سکیورٹی کے نام پر کیے گئے اقدامات عالمی قوانین کی خلاف ورزی ہیں۔یہ ثابت ہوچکا ہے کہ دنیا کاامن تباہ کرنے میں امریکہ کا ہاتھ ہے۔حکومت پاکستان دوٹوک موقف اختیار کرتے ہوئے برابری کی سطح پر تعلقات استوار کرے۔ڈاکٹر سید وسیم اختر نے بلوچستان میں مسخ شدہ لاشوں کے ملنے پر شدید الفاظ میں رد عمل کا اظہار کرتے ہوئے کہا ہے کہ بلوچستان میں آگ لگی ہوئی ہے کسی کو کوئی فکر نہیں۔

دنیا کی20سے زائد خفیہ ایجنسیاں بشمول راء،موساد اور سی آئی اے خطے کا امن تباہ کرنے کے درپے ہیں۔نومنتخب حکومت بلوچستان کے معاملے کو سنجیدگی سے لیتے ہوئے قاتلوں کو گرفتار کرکے کیفر کردار تک پہنچائے۔پاکستان کو درپیش خطرات سے نمٹنے کے لئے سب کو مل کرکام کرنا ہوگا۔
Live وزیراعظم شہباز شریف سے متعلق تازہ ترین معلومات