کرکٹ کے تاریخی کمنٹیٹر رچی بینو کار حادثے میں زخمی، امید ہے بینو رو بصحت ہونے کے بعد کمنٹری باکس میں واپس آجائیں گے ،آسٹریلوی چینل ، خود سے زیادہ اپنی نایاب گاڑی کے حوالے سے فکر مند تھا ، بینو کا بیان

جمعہ 25 اکتوبر 2013 14:19

سڈنی(اُردو پوائنٹ تازہ ترین اخبار۔ 25اکتوبر 2013ء) کرکٹ کے تاریخی کمنٹیٹر رچی بینو کار حادثے میں زخمی ہو گئے۔ میڈیا رپورٹ کے مطابق ٹیسٹ کرکٹ سے ریٹائر ہونے کے بعد 1964 سے کمنٹری باکس میں اپنی آواز اور ماہرانہ تبصروں سے شہرت حاصل کرنے والے بینو بدھ کو سڈنی میں اپنے گھر جا رہے تھے کہ ان کی گاڑی فٹ پاتھ پر چڑھنے کے بعد دیوار سے جا ٹکرائی۔83 سالہ سابق آسٹریلوی کپتان کو سینے اور کندھے پر چوٹیں آئیں ہیں جو اگلے مہینے انگلینڈ کے خلاف ایشز سیریز میں آسٹریلیا کے چینل نائن سے کمنٹری کرنے والے تھے۔

چینل کی جانب سے ایک جاری بیان میں بتایا گیا کہ وہ کچھ دنوں تک ہسپتال میں ہی رہیں گے۔بیان کے مطابق کچھ تکلیف محسوس کرنے کے باوجود آسٹریلیا کے سابق کرکٹ کپتان اور تاریخی آل راوٴنڈر کے حوصلے بلند اور حس مزاح بھرپور ہے حادثے کے وقت بینو اپنی قدیم 1963 کی سن بیم الپائن گاڑی خود ہی چلا رہے تھے اور واقعہ کے بعد انہیں خود سے زیادہ گاڑی کی فکر تھی۔

(جاری ہے)

انہوں نے اپنے ایک بیان میں کہا، واقعہ میں کوئی دوسرا زخمی نہیں ہوا اور میں خود سے زیادہ اپنی نایاب گاڑی کے حوالے سے فکر مند تھا۔بیان کے ساتھ ساتھ گاڑی کی تصاویر بھی جاری کی گئی ہیں جن میں اس کا تباہ شدہ اگلا حصہ اور بچ جانے والی ونڈ سکرین دیکھی جا سکتی ہے۔بینو کی بیوی ڈیفنی نے بتایا کہ حادثہ کے بعد ان کے شوہر ہل کر رہ گئے ہیں تاہم وہ جلد ہی اپنے معمولات کی طرف لوٹ آئیں گے۔ نائن کے چیف ایگزیکٹو ڈیوڈ جینجل نے کہا کہ امید ہے کہ بینو رو بصحت ہونے کے بعد کمنٹری باکس میں واپس آجائیں گے۔

متعلقہ عنوان :