صوبائی وزیرصحت اور اقلیتی امور خلیل طاہرسندھو کا استعفی منظور

لاہور(اُردو پوائنٹ تازہ ترین اخبار۔ 11نومبر 2013ء) وزیراعلی پنجاب نے صوبائی وزیرصحت اور اقلیتی امور خلیل طاہرسندھو کا استعفی منظور کرلیا۔ دو روز قبل صوبائی کابینہ میں ڈینگی سے متعلق اجلاس میں وزیراعلی پنجاب شہباز شریف نے وزیر صحت اور اقلیتی امور خلیل طاہر سندھو کی سرزنش کی تھی اور انہیں ڈینگی پھیلنے کا ذمہ دار ٹہرایا تھا، جس پر خلیل طاہر سندھو نے اپنے عہدے سے استعفی دینے کا اعلان کرتے ہوئے استعفی ایوان وزیراعلی کو بھجوا دیا جسے منظور کرلیا گیا، خلیل طاہر سندھو کے پاس اقلیتی امور اور صحت کے قلمندان تھے۔

(جاری ہے)

نجی ٹی وی سے گفتگو کرتے ہوئے خلیل طاہر سندھو نے کہا کہ وہ ہمیشہ وزیراعظم نوازشریف اور پارٹی کے وفادار رہیں گے، ان کے ساتھ زیادتی ہوئی اور پہلی بار ان کوملک میں اقلیت ہونے کا احساس ہوا، انہوں نے کہا کہ وزیراعلی پنجاب کی سرزنش بالکل بے بنیاد تھی، 2011 میں ڈینگی کی وجہ سے 300 سے زائد افراد جان کی بازی ہار گئے، لیکن اس کے باوجود کسی وزیر نے استعفی نہیں دیا، خلیل طاہر سندھو نے کہا کہ وزارتوں سے استعفی کے باوجود مسلم لیگ (ن) کے ورکر ہونے کے ناطے پارٹی کے لئے کام کرتا رہوں گا۔