سرکاری و غیر سرکاری اداروں او ر عوام کے باہمی تعاون سے ڈینگی پر قابو پانے میں کافی مدد ملی ہے‘ ڈپٹی سیکرٹری لائیو سٹاک ` این جی اوز کے کردار کو مزید فعال بنایا جائے ،ان کیلئے ٹاسک مقرر کئے جائیں‘ عامر علی چشتی کا اجلاس سے خطاب

لاہور (اُردو پوائنٹ اخبار تازہ ترین۔22نومبر۔2013ء) ڈپٹی سیکرٹری لائیو سٹاک عامر علی چشتی نے کہا ہے کہ سرکاری و غیر سرکاری اداروں او ر عوام کے باہمی تعاون سے ڈینگی پر قابو پانے میں کافی مدد ملی ہے ‘ ڈینگی سے نجات کے لئے تمام اداروں کے فعال کردار سے مثبت نتائج سامنے آئے ہیں ۔ان خیالات کا اظہار انہوں نے جمعہ کے روز اسسٹنٹ کمشنر کینٹ کے دفتر میں انسداد ڈینگی ایمرجنسی رسپانس کمیٹی عزیز بھٹی ٹاؤن کے اجلاس کی صدارت کرتے ہوئے کہی ۔

ایم پی اے ملک وحید ،اسسٹنٹ کمشنر کینٹ نبیلہ فاروق سمیت دیگر متعلقہ محکموں کے افسران اور یونین کونسلوں کے کو آرڈینیٹر ز اس موقع پر موجود تھے۔ڈپٹی سیکرٹری عامر علی نے افسران پر زور دیتے ہوئے کہا کہ وہ ڈینگی کے خاتمے کی مہم میں سرکاری وغیر سرکاری ادارے عوامی شعور و آگاہی کی کاوشوں میں مزید تیزی لائیں اور تعلیمی اداروں میں ڈینگی آگاہی پیریڈز ،لیکچرز اور سیمینارز کے باقاعدہ انعقاد سمیت یونین کونسلوں میں واٹر ٹینکوں ،ٹیو ب ویلوں کی لیکج اور دیگر حفاظتی اقدامات پر کڑی نظر رکھیں۔

(جاری ہے)

انہوں نے کہا کہ این جی اوز کے کردار کو مزید فعال بنایا جائے اور ان کیلئے ٹاسک مقرر کئے جائیں۔انہوں نے کہا کہ جہاں کہیں بھی گندگی نظر آئے بلاتاخیر صفائی ستھرائی کا انتظام کرایا جائے اور ان ڈور اور آؤٹ ڈور اقدامات کو سو فیصد یقینی بنایا جائے ۔انہوں نے کہا کہ کوشش کی جائے کہ ڈینگی پر قابو پاتے ہوئے صحت مند ماحول کے قیام میں ہر شخص اپنا بھر پورکردار جاری رکھے۔

اجلاس میں ڈپٹی ڈسٹرکٹ آفیسر ہیلتھ ڈاکٹر نہیم نے بتایا کہ عزیز بھٹی ٹاؤن کے 13افراد ڈینگی کی وجہ سے مختلف ہسپتالوں میں زیر علاج ہیں تاہم محکمہ صحت اپنی محکمانہ ذمہ داریوں کو با طریق احسن پوری کرنے میں دن رات کوشاں ہے ۔اجلاس میں لاہور ویسٹ مینجمنٹ ،ہائر ایجوکیشن،سکول ایجوکیشن،واسا ،ایل ڈی اے سمیت دیگر متعلقہ محکمہ جات کے افسران نے انسداد ڈینگی مہم کے سلسلے میں کئے جانے والے اقدامات سے شرکاء اجلاس کو آگاہ کیا۔