آزادکشمیر میں پہلی مرتبہ میرپور میں اعلیٰ ترین ڈائیلسز کی سہولیات فراہم کر کے ڈاکٹر ریاست نے قوم کا سر فخر سے بلند کر دیا‘حاجی محمد سلیم،تارکین وطن کے لیے نجی شعبہ میں گردوں کی بیماریوں میں مبتلا مریضوں کے لیے ” ریاست ہسپتال کڈنی ڈائیلاسز سنٹر “ کا آغاز انتہائی خوش آئند ہے

میرپور(اُردو پوائنٹ تازہ ترین اخبار۔ 5 دسمبر 2013ء) آزادکشمیر میں پہلی مرتبہ میرپور میں اعلیٰ ترین ڈائیلسز کی سہولیات فراہم کر کے ڈاکٹر ریاست نے قوم کا سر فخر سے بلند کر دیا ہے میرپور میں دس لاکھ سے زائد تارکین وطن کے لیے نجی شعبہ میں گردوں کی بیماریوں میں مبتلا مریضوں کے لیے ” ریاست ہسپتال کڈنی ڈائیلاسز سنٹر “ کا آغاز انتہائی خوش آئند ہے میں خود ڈائیلاسز کرواتا ہوں اور برطانیہ کے معالجین عرصہ دراز سے یہ بات کہتے چلے آ رہے ہیں کہ میرپور میں ڈائیلاسز کی اعلیٰ سہولیات کا آغاز انتہائی ضرور ی ہے ان خیالات کا اظہار بانی کشمیر انسٹی ٹیوٹ آف کارڈ یالوجی معروف سماجی و کاروباری شخصیت حاجی محمد سلیم نے ریاست ہسپتال میرپور میں کڈنی ڈائیلاسز سنٹر کا افتتاح کرنے کے موقع پر گفتگو کے دوران کیا ۔

(جاری ہے)

اس موقع پر صدر پاکستان میڈیکل ایسوسی ایشن ڈاکٹر جاوید چوہدری ،صدر ہاسپٹل آنر ایسوسی ایشن و سابق صدر چیمبر آف کامرس ڈاکٹر اکرم چوہدری ،چیئرمین سٹی فورم ڈاکٹر سی ایم حنیف ،صدر پاکستان ڈینٹل ایسوسی ایشن ڈاکٹر طاہر محمود ،صدر فرینڈز فورم ڈاکٹر امجد محمود ڈاکٹر غزالہ اکرم ،سپریم ہیڈ انجمن تاجراں سہیل شجاع مجاہد ،راجہ خالد محمود ،ڈاکٹر خالد ،ڈاکٹر شہزاد شیخ ،ڈاکٹر ایوب قریشی ،چوہدری اللہ دتہ ،عظیم دت ایڈووکیٹ ،راجہ آزادحسین اور جنید انصاری کے علاوہ دیگر شخصیا ت بھی موجود تھیں ۔

حاجی محمد سلیم نے کہا کہ گردے فیل ہونے کی صورت میں اگر ڈائیلاسز کی سہولیات حفظان صحت کے اصولوں کے مطابق مہیا ہوں تو انسان لمبے عرصے تک صحت مند زندگی گزار سکتا ہے اس موقع پر ڈاکٹر ریاست علی چوہدری سابق صدر پی ایم اے نے کہا کہ انہوں نے مشنری جذبے کے تحت یہ ادارہ قائم کیا ہے اور ماہر امراض گردہ بلڈ پریشر و ڈائیلاسز ڈاکٹر شہزاد احمد شیخ پمز اسلام آباد کے تربیت یافتہ ماہر ہیں ان کی سربراہی میں عوام علاقہ کو پہلی مرتبہ نجی سطح پر اعلیٰ ترین ڈائیلاسز کی سہولت سے امراض گردہ کے علاج کے حوالے سے اہم ترین پیش رفت ہوئی ہے ۔