انجیر قوت مدافعت بڑھاتا ہے ، دماغی امراض کے ساتھ کمر کے درد میں بھی مفید ہے‘ پروفیسر حکیم غلام فرید میر

لاہور (اُردو پوائنٹ تازہ ترین اخبار۔ 11دسمبر 2013ء) انجیر کے متعلق حضور نبی کریم صلی اللہ علیہ وآلہ وسلم کا ارشاد ہے کہ ”انجیر جنت کا میوہ ہے، کھانے میں بے حد لذیذ و غذائی اور دوائی اجزاء کا انمول مجموعہ ہے، گرم خشک مزاج کی حامل انجیر پانی اور معدنی نمکیات کا خزانہ ہے اس میں فولاد ، فاسفورس ، تانبہ ، کیلشیم ، سوڈیم، آئیوڈین شامل ہیں یہ وٹامنز اے، بی اور ڈی کا خزانہ ہے ،اس کا استعمال جسم کو سرخ و سفید بناتا ہے اس کے علاوہ یہ دائمی قبض دور کرنے کیلئے بہترین غذا اور دوا ہے، انجیر قوت مدافعت بڑھاتا ہے ، دماغی امراض کے ساتھ کمر کے درد میں بھی مفید ہے ۔

ان خیالات کا اظہار پروفیسر حکیم غلام فرید میر نے دواخانہ باب الفضل پرانی انار کلی لاہور میں ” دوائے غذائی“ کے عنوان سے منعقدہ ایک تحقیقی نشست میں انجیر کے فوائد بتاتے ہوئے کیا۔

(جاری ہے)

اس موقع پر پروفیسر حکیم محمد افضل میو، پروفیسر حکیم محمد الیاس دُنیا پوری، پروفیسر حکیم سید عمران فیاضسمیت دیگر بھی موجود تھے ۔۔پروفیسرغلام فرید میر نے بتایا کہ انجیر بڑھی ہوئی (ورم) تلی اور جگر کی سختی دور کرتی ہے۔

اس میں موجود ریشے انسولین اور خون میں زائد شکر کی سطح کو کم کرتی ہیں جسکی وجہ سے ذیابیطس(شوگر) میں مفید ہے۔پیشاب آور ہونے کی وجہ سے گردے، مثانے کی پتھری نکل جاتی ہے۔گردہ، مثانہ، حلق کی سوزش، پھیپھڑوں کی خشونت اور خشکی کیلئے بھی نافع ہے۔ آنتوں کے فعل درست اور نرم رکھتی ہے ، لہٰذا اسکے نہار منہ کھانے میں زیادہ فائدے ہیں۔ بلغمی کھانسی ، خون صاف کرنے، جوڑوں کے درد کیلئے سود مند ہے اور ہڈیوں اور دانتوں کو مضبوط کرتا ہے۔برص (سفید داغ) چنبل، ایگزیما کیلئے تازہ انجیر کا دودھ موٴثر ہے۔