عوام کو صحت کی بنیادی سہولیات کی فراہمی کیلئے خصوصی اقدامات کئے جارہے ہیں۔ نجیب نقی

مظفر آباد (اردوپوائنٹ اخبار تازہ ترین31 مارچ 2007) آزاد کشمیر کے وزیر صحت ڈاکٹر نجیب نقی نے کہا ہے کہ حکومت عوام کو صحت کی جدید سہولیات فراہم کرنے کے لئے ہر ممکن اقدامات کررہی ہے ڈاکٹرز اپنی ذمہ داریوں کا احساس کریں اور ملی جذبے کے ساتھ دکھی انسانیت کی خدمت کریں حکومت ڈاکٹروں کے مسائل ترجیحی بنیادوں پر حل کرے گی انہوں نے ان خیالات کا اظہار گزشتہ روز یہاں پاکستان میڈیکل ایسوسی ایشن ضلع مظفر آباد کی تقریب حلف برداری سے خطاب کرتے ہوئے کیا انہوں نے نومنتخب عہدیدارارنکو مبارکباد دی اور اس توقع کا اظہار کیا کہ ڈاکٹر صاحبان اپنی پیشہ وارانہ ذمہ داریوں کو برطریق احسن نبھائیں گے انہوں نے کہا کہ نومنتخب مرکزی اور ضلعی پی ایم اے کے چارٹر آف ڈیمانڈ کا جائزہ لیا جارہا ہے جو کہ عنقریب منطوری کیلئے وزیراعظم سردار عتیق احمد خان کو پیش کردیا جائے گا وزیراعظم جو صحت اور تعلیم پر خصوصی توجہ دے رہے ہیں ڈاکٹروں کے مسائل کے حل میں گہری دلچسپی رکھتے ہیں اور وہ بھی جلد ان مسائل کے حل کیلئے ایک پیکج کا اعلان کریں گے۔

(جاری ہے)

انہوں نے کہا کہ اب وقت آگیا ہے کہ ڈاکٹرز اپنی ذمہ داریوں کا احساس کریں اور عوام کی خدمت کو اپنا شعار بنائیں۔ تقریب سے ڈائریکٹر جنرل ہیلتھ ڈاکٹر قربان نے خطاب کرتے ہوئے ڈاکٹروں کے تمام جائز مسائل کے حل کی یقین دہانی کرائی۔ اس موقع پر سردار گل خنداں چیئرمین ہائر کمیشن ڈاکٹڑ بشیر الرحمن کنٹھ ڈاکٹر سلیم عباسی مرکزی صدر پی ایم اے اور ضلعی صدر ڈاکٹر مصطفی اعوان نے بھی خطاب کیا۔